ბრიუსელს აქვს საბავშვო ბაღის დონის საგარეო პოლიტიკა – პაპუაშვილი

„სამწუხაროდ, ბრიუსელს აქვს საბავშვო ბაღის დონის საგარეო პოლიტიკა და ეს გადაწყვეტილება კი იმასაც აჩვენებს, რომ უკვე არათუ ფაქტებს უარყოფენ, თუ სად არის საქართველო ეკონომიკური განვითარებით, სად არის საქართველო დემოკრატიული განვითარებით, სად არის საქართველო ინსტიტუციური განვითარებით, სად არის საქართველო ევროინტეგრაციის განვითარებით, არათუ ამას აღარ ხედავენ, რუკას აღარ ხედავენ, გეოგრაფიას აღარ აღიარებენ.

ჩვენ ის გვიკვირს რომ მსოფლიო ბანკის და სხვა ორგანიზაციების რეიტინგებს აღარ აღიარებენ? გეოგრაფიას როცა აღარ აღიარებენ საგარეო პოლიტიკაში, უპირველეს ყოვლისა, მეტყველებს მათზე.

ჩვენ ბრიუსელთან ვართ სტრატეგიული მოთმინების პოლიტიკაში. ვნახოთ, უნდა დაველოდოთ. ეს არის ის საგარეო პოლიტიკა, რომელსაც დღეს ბრიუსელი ეწევა. ეს არის ნაწილი არაკვალიფიციური მიდგომის ნაწილი. ამით ზიანდება თავად ბრიუსელი“, – უთხრა პაპუაშვილმა ჟურნალისტებს.

„ქართული ოცნების“ საგარეო საქმეთა სამინისტრომ გუშინ დაადასტურა, რომ უწყების ხელმძღვანელი მაკა ბოჭორიშვილი არ მიუწვევიათ ევროკავშირის საგარეო ქმედებათა სამსახურის მხრიდან დაგეგმილ მინისტერიალში. სამინისტროს პრესსამსახურის განცხადებაში ნათქვამია, რომ „საქართველოს ელჩის დონეზე მიწვევა მიუღებელია და გაუგებარია ამგვარი მიდგომის საფუძველი და მიზეზი“. განცხადების მიხედვით, საქართველო მინისტერიალში ელჩის დონეზე მონაწილეობას არ მიიღებს.

ევროკავშირის წარმომადგენლებმა არაერთხელ განმარტეს, რომ დემოკრატიული უკუსვლის საპასუხოდ, საქართველოსთან პოლიტიკური კონტაქტები სრულად შეამცირეს.