ბაიდენმა ჩინეთს „ნელი მოქმედების ბომბი“ უწოდა

„მათ გარკვეული პრობლემები აქვთ, ეს არ არის კარგი, რადგან როდესაც ცუდ ადამიანებს პრობლემები აქვთ, ისინი ცუდ საქმეებს სჩადიან“, - განაცხადა ამერიკის პრეზიდენტმა.

ამ განცხადებას წინ უძღოდა ჯო ბაიდენის ახალი განკარგულება, რომელიც ნაწილობრივ ზღუდავს ამერიკულ ინვესტიციებს ჩინეთის ტექნოლოგიურ ბაზარზე. შეზღუდვები შეეხება სამ სექტორს - ხელოვნური ინტელექტის გარკვეულ სისტემებს, კვანტურ საინფორმაციო ტექნოლოგიებს და ნახევარგამტარებსა და მიკროელექტრონიკას. თეთრი სახლში აცხადებენ, რომ მიღებული გადაწყვეტილების მიზეზი ეროვნული უსაფრთხოების საკითხია და არა ეკონომიკური ინტერესები.

ჯო ბაიდენმა ჩინეთის შესახებ ივნისშიც ისაუბრა, როცა ქვეყნის პრეზიდენტს, სი ძინპინს „დიქტატორი“ უწოდა, რაც პეკინში პროვოკაციად შეაფასეს.

აღსანიშნავია, რომ საქართველო და ჩინეთი სტრატეგიულ პარტნიორობაზე შეთანხმდნენ. ამის შესახებ გადაწყვეტილება გასულ თვის ბოლოს პრემიერ-მინისტრ ირაკლი ღარიბაშვილის პეკინში ვიზიტის დროს იქნა მიღებული, როდესაც ის სი ძინპინს შეხვდა. შეხვედრის შემდეგ მხარეებმა ხელი მოაწერეს „სარტყლისა და გზის ინიციატივის“ ფარგლებში ორმხრივი თანამშრომლობის გეგმას. ეს ინიციატივა რამდენიმე კვირის წინ იტალიამ დატოვა. ჩინეთში ირაკლი ღარიბაშვილის ვიზიტის თაობაზე საქართველოში ამერიკის ელჩმა, კელი დეგნანმა თქვა, რომ საქართველოს მთავრობის საქმეა, რა სახის ურთიერთობა სურს ჩინეთთან, თუმცა მან პრემიერს შეახსენა, რომ „სარტყლისა და გზის ინიციატივას“ უკვე რამდენიმე ქვეყანამ აქცია ზურგი. ამერიკელმა დიპლომატმა იმედი გამოთქვა, რომ ეს გადაწყვეტილება საქართველოს კარგ შედეგებამდე მიიყვანს.