აშშ-ის სანქციების შემდეგ რუსული ნავთობკომპანია „ლუკოილი“ უცხოურ აქტივებს ყიდის

„ზოგიერთი სახელმწიფოს მიერ კომპანიისა და მისი შვილობილი კომპანიების მიმართ შემზღუდავი ზომების შემოღების გამო, კომპანია აცხადებს საერთაშორისო აქტივების გაყიდვის განზრახვის შესახებ. პოტენციური მყიდველებისგან შეთავაზებების განხილვა დაწყებულია“, - ნათქვამია სს „ლუკოილის“ ინგლისურენოვან ვებსაიტზე გამოქვეყნებულ პრესრელიზში.

„ლუკოილი“ განმარტავს, რომ აქტივების გაყიდვა ხორციელდება აშშ-ის ხაზისნის დეპარტამენტის უცხოური აქტივების კონტროლის ოფისის (OFAC) ლიკვიდაციის ლიცენზიის ფარგლებში. საჭიროების შემთხვევაში, კომპანია გეგმავს ლიცენზიის გაგრძელების მოთხოვნას, რათა უზრუნველყოს თავისი საერთაშორისო აქტივების შეუფერხებელი ფუნქციონირება.

22 ოქტომბერს აშშ-ის ხაზინის დეპარტამენტმა დამატებითი სანქციები გამოაცხადა უკრაინაში რუსეთის მიერ დაწყებული ომის დასრულების მიზნით „რუსეთის მხრიდან სამშვიდობო პროცესისადმი სერიოზული ინტერესის არარსებობის“ გამო. დეპარტამენტის ხელმძღვანელის, სკოტ ბესენტის განცხადებით, „იმის გათვალისწინებით, რომ პრეზიდენტი პუტინი უარს ამბობს ამ უაზრო ომის დასრულებაზე“, სანქციები დაუწესდა რუსეთის ორ უდიდეს ნავთობკომპანიას - „როსნეფტსა“ და „ლუკოილს“ , რომლებიც „აფინანსებენ კრემლის საომარ მანქანას“.

აშშ-ის სანქციები გავრცელდება „ლუკოილისა“ და „როსნეფტის“ იმ შვილობილ კომპანიებზეც, სადაც ისინი 50%-იან წილს ან მეტს ფლობენ.

მანამდე, ოქტომბრის დასაწყისში, „ლუკოილისა“ და „როსნეფტის“ მიმართ შეზღუდვები დიდმა ბრიტანეთმა გამოაცხადა. ევროკავშირმა ასევე დააწესა სანქციები „ლუკოილის“ დუბაის სავაჭრო განყოფილების წინააღმდეგ.

„ლუკოილი“ საქართველოს ბაზარზე 2002 წლიდანაა წარმოდგენილი. მისი ძირითადი საქმიანობა ნავთობპროდუქტების იმპორტი და საქართველოს შიდა ბაზარზე რეალიზაციაა. შპს „ლუკოილ-ჯორჯიას“ 100%-იან წილს ავსტრიაში რეგისტრირებული LUKOIL International GmbH ფლობს.