არასამთავრობოები სასამართლოსგან რაჟდენ კუპრაშვილის ბრძანების ბათილად ცნობას ითხოვენ

„რაჟდენ კუპრაშვილმა თავის თავს და ანტიკორუფციულ ბიუროს იმაზე მეტი უფლებამოსილება მიანიჭა ვიდრე ეს განსაზღვრულია „უცხოეთის აგენტების რეგისტრაციის აქტში“.

მას შეუძლია დაიწყოს მოკვლევა, ინსპექტირება, მიმართოს სასამართლოს ყადაღის დადების მოთხოვნით იმ ორგანიზაციების მიმართ, ვისაც მიაჩნიათ, რომ არ უნდა დარეგისტრირდნენ შესაბამის რეესტრში. ამგვარი უფლებამოსილებები „უცხოეთის აგენტების რეგისტრაციის აქტში“ არ არის გაწერილი და ფორმალური საკანონმდებლო საფუძვლის გარეშე მოხდა მათი მიღება“, - განაცხადა გიორგი ბურჯანაძემ, „სამოქალაო საზოგადოების ფონდის“ სამართლებრივმა მრჩეველმა, ორგანიზაციების ერთობლივ ბრიფინგზე.

ბურჯანაძის თქმით, ანტიკორუფციული ბიუროს უფროსის ბრძანება ქართველი ხალხის ინტერესების სასარგებლოდ მომუშავე ორგანიზაციების უფლებების დარღვევას იწვევს.

„ჩვენი უფლებები იზღუდება კანონმდებლობისა და კონსტიტუციის დარღვევით მიღებული ნორმების საფუძველზე. თბილისის საქალაქო სასამართლოსგან ვითხოვთ 2025 წლის 31 მაისის ბრძანების ცალკეული დებულებების ბათილად გამოცხადებას ზოგადი ადმინისტრაციული კოდექსის საფუძველზე მათი უკანონობის გამო“, - აღნიშნა გიორგი ბურჯანაძემ.

„ქართული ოცნების“ დაქვემდებარებაში არსებულ ანტიკორუფციულ ბიუროს რაჟდენ კუპრაშვილის 31 მაისის ბრძანების საფუძველძე ინსპექტირება აქვს დაწყებული 7 არასამათვრობო ორგანიზაციის წინააღმდეგ. ესენია:

• „სამოქალაქო საზოგადოების ფონდი“
• „საფარი“
• „საერთაშორისო გამჭვირვალობა - საქართველო“
• „სამართლიანი არჩევნები“
• „სოციალური სამართლიანობის ცენტრი“
• „მედიის განვითარების ფონდი“
• „კონომიკური პოლიტიკის კვლევის ცენტრი“

აგვისტოსში ანტიკორუფციულმა ბიურომ ორგანიზაციებს მოსთხოვა განმარტება, რატომ არ დარეგისტრირდნენ „აგენტებად“ და ისინი სისხლისსამართლებრივი პასუხისმგებლობის შესახებ გააფრთხილა.