აფხაზეთში რუსული ენისა და ლიტერატურის მასწავლებლებს რუსეთიდან დააფინანსებენ

რუსეთის პრეზიდენტის ადმინისტრაციის უფროსის პირველმა მოადგილემ, სერგეი კირიენკომ, რომელიც კრემლში აფხაზეთის მიმართულებას კურირებს, ივლისში განაცხადა, რომ რუსეთი აფხაზეთში რუსული ენის მასწავლებლებისთვის დამატებითი ანაზღაურების უზრუნველსაყოფად წელიწადში 54 მილიონი რუბლს გამოჰყოფდა.

„2025 წლის 1 სექტემბრიდან დაწესდეს ყოველთვიური დანამატები აფხაზეთის რესპუბლიკის სახელმწიფო ზოგადსაგანმანათლებლო დაწესებულებებში მომუშავე, რუსული ენისა და ლიტერატურის მასწავლებლებისა და ლექტორების განაკვეთებსა და ხელფასებზე, 5 ათასი რუბლის ოდენობით“, – ნათქვამია დე ფაქტო მთავრობის განკარგულებაში.

გარდა ამისა, აფხაზეთის ზოგადსაგანმანათლებლო დაწესებულებებში ყოველთვიურ დანამატს, 5000 რუბლის ოდენობით, მიღებენ აფხაზური ენისა და ლიტერატურის მასწავლებლები და ლექტორებიც, რაც არსებულ 1000-რუბლიან დანამატთან ერთად, 6000 რუბლი გახდება.

 აფხაზური ენისა და ლიტერატურის მასწავლებლებისთვის დამატებითი თანხები ე.წ. რესპუბლიკის „საკუთარი სახსრებიდან“ გამოიყოფა,  ხოლო რუსული ენისა და ლიტერატურის მასწავლებლებისთვის – რუსეთის ფინანსური დახმარებიდან.

აფხაზეთის ე.წ. განათლების მინისტრის, ხანა გუნბას თქმით, რესპუბლიკის ზოგადსაგანმანათლებლო დაწესებულებებში აფხაზური ენისა და ლიტერატურის 760 და რუსული ენისა და ლიტერატურის 762 მასწავლებელი მუშაობს.