ანუკი ჩრდილელი, „ქართული ოცნების“ ყოფილი დეპუტატის შვილი, 4000 ლარით დააჯარიმეს

ანუკი ჩრდილელი „ქართული ოცნებიდან“  ორი მოწვევის პარლამენტის წევრის და თბილისის საკრებულოს დეპუტატობის კანდიდატის, ოთარ ჩრდილელის შვილია. ის ერთ-ერთია 2 სექტემბერს რუსთაველის გამზირზე დაკავებულ იმ დემონსტრანტებს შორის, რომლებიც თეა წულუკიანის საგამოძიებო კომისიის დასკვნას აპროტესტებდნენ.

ანუკი ჩრდილელი ამბობდა, რომ დაკავების დროს რუსთაველის თეატრთან, ტროტუარზე იდგა და სამართალდარღვევა არ ჩაუდენია.

„ჩემზე მოხდა თითით მითითება - ეს ის არის და დააკავეთ. რეალურად, ვიდექი ტროტუარზე და ვიძახდი, რატომ აკავებდნენ ადამიანებს“, - თქვა ჩრდილელმა დღევანდელ სასამართლო სხდომამდე.

დაკავების შემდეგ ანუკი ჩრდილელი „ქართული ოცნების“ მხარდამჭერების მხრიდან მადისკრედიტებელი კამპანიის სამიზნე გახდა. პროპაგანდისტმა თამთა მეგრელიშვილმა Facebook-ზე დაწერა, რომ მას „მენტალური პრობლემები აქვს“ და მამამისს მასთან არანაირი კავშირი არ აქვს. ამასთან, პოსტში, რომელიც მოგვიანებით წაშალა, მეგრელიშვილი წერდა, თითქოს, ოთარ ჩრდილელი აფინანსებდა შვილის „მკურნალობის ხარჯებს თურქეთისა და ისრაელის ფსიქიატრიულ კლინიკებში“.

დროებითი მოთავსების იზოლატორიდან გამოსვლის შემდეგ ანუკი ჩრდილელმა „ქართული ოცნების“ პროპაგანდისტი ცრუ ინფორმაციის გავრცელებაში დაადანაშაულა და განაცხადა, რომ მას სასამართლოში უჩივლებს.