საქართველოს იუსტიციის სამინისტრომ ანაკლიის პორტთან დაკავშირებულ საარბიტრაჟო დავებზე 63 242 418 ლარი დახარჯა. ამის შესახებ „ქართული ოცნების“ იუსტიციის მინისტრის მოადგილემ, ბექა ძამაშვილმა განაცხადა. ძამაშვილი პასუხისმგებლობას მოსარჩელეებს - „ანაკლიის განვითარების კონსორციუმსა“ და ინვესტორ ბობ მეიერს აკისრებს.
ახალი ამბები
მკითხველის რჩეული
- 1 რუსეთი ალეკო ელისაშვილს დაუსწრებლად ასამართლებს უკრაინაში ბრძოლისთვის
- 2 როგორ დაგეგმეს ლევან ჯანგველაძის შეკვეთილი მკვლელობა - პროკურატურამ 5 პირს ბრალი წარუდგინა
- 3 „ქართულმა ოცნებამ“ 63 მუნიციპალიტეტში მერობის კანდიდატები წარადგინა
- 4 დასკვნითი სხდომის პარალელურად, ბათუმში მზია ამაღლობელის მხარდამჭერი აქცია იმართება
- 5 სახელმწიფო დეპარტამენტის ანგარიში: „ტიტუშკები“, თავდასხმები მედიაზე და დაუსჯელობა
- 6 მნიშვნელოვანია, საქართველოს ხელისუფლების აღიარება საქმედ იქცეს – ზახაროვა აგვისტოს ომზე
„როდესაც სახელმწიფოს ედავები 4 მილიარდზე მეტი ზიანის ანაზღაურებას, ბუნებრივია, სახელმწიფო ვალდებულია, თავი დაიცვას და ამისთვის შესაბამისი ხარჯები გასწიოს. ფაქტობრივად, შეიძლება ითქვას, რომ ის რამდენიმე ათეული მილიონი, რომელიც სახელმწიფოს დასჭირდა ამ დავის საწარმოებლად, მათ კისერზეა, რადგან ჩვენ დავის პროცესში ბევრი შეთავაზება გავუკეთეთ, რათა ეს ხარჯები ყველასთვის დაზოგილი ყოფილიყო. შევთავაზეთ, რომ მხოლოდ ერთ არბიტრაჟში წარმოებულიყო დავა, მაგრამ მათ უნდოდათ პარალელურად ამ დავების წარმოება და ესეც ძალიან მკაფიოა, რა იყო მათი მიზანი - მაქსიმალური ზიანი მიეყენებინათ სახელმწიფოსთვის“, – განაცხადა ბექა ძამაშვილმა.
31 ივლისს, ვაშინგტონის არბიტრაჟმა (მსოფლიო ბანკის საინვესტიციო დავების გადაწყვეტის საერთაშორისო ცენტრი - ICSID) არ დააკმაყოფილა „ანაკლიის განვითარების კონსორციუმის“ ჰოლანდიელი ინვესტორის, ბობ მეიერის სარჩელი და მას საქართველოს მთავრობის სასარგებლოდ 6.5 მილიონი აშშ დოლარის [დღევანდელი კურსით დაახლოებით 17 500 000 ლარი] გადახდა დააკისრა. როგორც ბექა ძამაშვილმა დღეს, 29 აგვისტოს განაცხადა, ეს თანხა საქართველოს ბიუჯეტში უკვე ასახულია.
საარბიტრაჟო მოსარჩელეებს სახელმწიფოსთვის ჯამში 20 მილიონ ლარამდე თანხის ანაზღაურება დაესკისრათ. ერთი წლის წინ, მამუკა ხაზარაძისა და ბადრი ჯაფარიძის მიერ დაფუძნებულმა „ანაკლიის განვითარების კონსორციუმმა“ დავა პარიზის არბიტრაჟში წააგო და სახელმწიფოს სასარგებლოდ 650 000 აშშ დოლარი [დღევანდელი კურსით დაახლოებით 1 700 000 ლარი) გადაიხადა.
„მყისიერად ამ გადაწყვეტილების შესრულება ადასტურებს, რომ მათ თავიდანვე იცოდნენ, რომ ამ საქმეში სახელმწიფო იყო მართალი. უბრალოდ, გარკვეული პოლიტიკური დივიდენდების მიღების მიზნით გამოიყენეს ეს საქმეები. ორ სხვადასხვა არბიტრაჟში შეიტანეს საქმე და ნიშანდობლივია, რომ გასულ წელს, როდესაც პარიზის არბიტრაჟმა მიიღო ანაკლიის კონსორციუმის წინააღმდეგ გადაწყვეტილება, მაშინაც არ გაასაჩივრეს ეს გადაწყვეტილება და ერთობლიობაში ეს ყველაფერი აჩვენებს, რომ მათ ეს საქმეები სჭირდებოდათ პოლიტიკური ნიშნით,“ – განაცხადა ბექა ძამაშვილმა.
ანაკლიის ღრმაწყლოვანი ნავსადგურის მშენებლობისა და ოპერირების შესახებ საქართველოს მთავრობასა და „ანაკლიის განვითარების კონსორციუმს“ შორის საინვესტიციო ხელშეკრულება 2016 წელს გაფორმდა. სტრატეგიულ პროექტად შეფასებული პორტის საფუძვლის ჩაყრის ცერემონიაში მაშინდელმა პრემიერ-მინისტრმა, გიორგი კვირიკაშვილმა და კონსორციუმის დამფუძნებელმა, მამუკა ხაზარაძემ მიიღეს მონაწილეობა „ანაკლიის განვითარების კონსორციუმში“ შედიოდნენ TBC Holding (საქართველო) და Conti Internmational (აშშ).
2019 წელს გენერალურმა პროკურატურამ TBC Holding-ის დამფუძნებლების, მამუკა ხაზარაძისა და ბადრი ჯაფარიძის წინააღმდეგ გამოძიება დაიწყო და მათ ბრალი 16 664 000 ამერიკული დოლარის უკანონო შემოსავლის ლეგალიზაციისთვისთვის წარუდგინა. საქმე ეხებოდა 2007 წელს „თიბისი ბანკში“ განხორციელებულ ტრანზაქციას.
3-წლიანი დავის შემდეგ, სასამართლომ მამუკა ხაზარაძე და ბადრი ჯაფარიძე, ასევე, ბიზნესმენი ავთანდილ წერეთელი დამნაშავედ ცნო და მათ 7-წლიანი პატიმრობა შეუფარდა, თუმცა, ფულის გათეთრების ბრალდება თაღლითობის მუხლით გადაკვალიფიცირდა და ბრალდებულებს ხანდაზმულობის გამო, სისხლისამართლებრივი პასუხისმგებლობა მოეხსნათ.
მამუკა ხაზარაძემ განაცხადა, რომ ბრალის წარდგენა ანაკლიის ღრმაწყლოვანი პორტის პროექტის შესაჩერებლად მოხდა. 2020 წელს მთავრობამ კონსორციუმთან ხელშეკრულება გაწყვიტა მის მიერ ვალდებულებების შეუსრულებლობის საფუძვლით.
„ანაკლიის განვითარების კონსორციუმმა“ და ერთ-ერთმა მთავარმა ინვესტორმა, ჰოლანდიელმა ბიზნესმენმა ბობ მეიერმა 2020 საქართველოს წინააღმდეგ ორი საარბიტრაჟო სარჩელი შეიტანეს. სარჩელებით მოთხოვნილი იყო სახელმწიფოს მხრიდან მიყენებული ზარალის ანაზღაურება, რაც, მომჩივანი მხარის დაანგარიშებით 1 მილიარდ დოლარს აღემატებოდა. „ანაკლიის განვითარების კონსორციუმი“ აცხადებდა, რომ ეს თანხა მოიცავდა კონსორციუმისა და ბობ მეიერის დანაკარგს, რაც იყო პირდაპირი შედეგი „საქართველოს მთავრობის კამპანიისა, ძირი გამოეთხარა ანაკლიის პორტის პროექტისთვის“. კონსორციუმმა საარბიტრაჟო სარჩელი საერთაშორისო სავაჭრო პალატის საერთაშორისო საარბიტრაჟო სასამართლოში (ICC) წარადგინა, ხოლო ბობ მეიერმა - საინვესტიციო დავების გადაწყვეტის საერთაშორისო ცენტრში (ICSID).
