საერთაშორისო ორგანიზაცია Amnesty International-ი სამოქალაქო აქტივისტ ზუკა ბერძენიშვილზე განხორციელებულ ძალადობრივ თავდასხმას ეხმაურება და ხელისუფლებას მოუწოდებს, ძალადობის ციკლი დაასრულოს.
ახალი ამბები
მკითხველის რჩეული
- 1 „რეპრესიები რეორგანიზაციის სახელით“ - თელავის უნივერსიტეტიდან 5 პროფესორი გაათავისუფლეს
- 2 თავდაცვის ყოფილი მინისტრის მოადგილე და ნათესავი დააკავეს 1.3 მლნ-ის გაფლანგვის ბრალდებით
- 3 თეა წულუკიანი ნანუკა ჟორჟოლიანს ცილისწამებისთვის სასამართლოში უჩივის
- 4 ნათესავებმა თბილისში იპოვეს ჩეჩნეთიდან ოჯახში ძალადობას გამოქცეული ქალი და მისი წაყვანა სცადეს
- 5 სტრასბურგის სასამართლომ გამოაქვეყნა კითხვები მზია ამაღლობელის საქმეზე
- 6 ახობაძის ადვოკატი: ექსპერტმა დაადასტურა, რომ ნარკოტიკის შესაფუთ მასალაზე გადატანილი იყო ნერწყვი
„ათობით მსგავსი ძალადობრივი ინციდენტის შემდეგ, სერიოზულ შეშფოთებას იწვევს ზუკა ბერძენიშვილზე თავდასხმა, რომელიც მოხდა სულ რამდენიმე საათში მას შემდეგ, რაც პირადად პარლამენტის თავმჯდომარემ მას ხელისუფლებისთვის საფრთხე უწოდა. ხელისუფლების წარმომადგენლების ასეთი ქმედებები ადვილად შეიძლება იყოს აღქმული, როგორც მწვანე შუქი ხელისუფლების კრიტიკოსების მიმართ დაუსჯელი ძალადობის განსახორციელებლად.
ჩვენ ღრმად შეწუხებულები ვართ საქართველოს მთავრობის ცრუ პრეტენზიით, რომ კრიტიკა, რომელსაც ისინი აწყდებიან, ძალადობრივი ანტისახელისუფლებო შეთქმულებაა. მათ მიერ განსხვავებული აზრის ჩახშობა არ არის დაცვის ფორმა, ეს არის თავდასხმა ადამიანის უფლებებზე და ადამიანის უფლებათა დაცვის სფეროში საქართველოს საერთაშორისო ვალდებულებების დარღვევაა. ხელისუფლების კრიტიკა, რაოდენ მკაცრიც არ უნდა იყოს ის, დაცულია სიტყვის თავისუფლებით, ყველა საჯარო მოხელე ვალდებულია, აიტანოს კრიტიკისა და დაკვირვების მაღალი დონე.
საქართველოს ხელისუფლებამ უნდა დაასრულოს ძალადობის ციკლი, დაუყოვნებლივ გამოიძიოს ყველა ძალადობრივი თავდასხმა და უზრუნველყოს, რომ დამნაშავეებმა, ვინც არ უნდა იყვნენ ისინი, პასუხი აგონ სამართლიანი სასამართლოს წინაშე“, - ამბობს Amnesty International-ის აღმოსავლეთ ევროპისა და ცენტრალური აზიის დირექტორის მოადგილე დენის კრივოშეევი.
ზუკა ბერძენიშვილს სამი ადამიანი თავს 11 ივნისს, თბილისში, საცხოვრებელ სახლთან ახლოს დაესხა. აქტივისტს სახეში სცემეს, რის გამოც ქირურგიული ოპერაცია დასჭირდა. თავდასხმამდე ერთი საათით ადრე, პარლამენტის თავმჯდომარე შალვა პაპუაშვილმა სოციალურ ქსელში პოსტი გამოაქვეყნა, სადაც ზუკა ბერძენიშვილს უწოდა ერთ-ერთი „აღშფოთებული მოქალაქე“, რომელიც მმართველი პარტიის წევრების წინააღმდეგ „ორგანიზებული და პოლიტიკურად მოტივირებული ტერორის კამპანიაში“ მონაწილეობს. პაპუაშვილის განცხადებით, ბერძენიშვილი მოძრაობა „სირცხვილიას“ წევრია და დეპუტატებს მუქარით და შეურაცხყოფით ურეკავდა. „დონორები, მათ მიერ დაფინანსებული ორგანიზაციების პოლიტიკური ექსტრემიზმის წაყრუებით, ტერორის ნორმალიზებას ახდენენ“, - წერდა პაპუაშვილი. ზუკა ბერძენიშვილი არ უარყოფს, რომ რუსული კანონის მხარდამჭერ დეპუტატებს ურეკავდა. მისი თქმით, უკვე ორი წელია მოძრაობა „სირცხვილიას“ წევრი აღარ არის და აქტივიზმისთვის ფული არასდროს აუღია.
7 ივნისს, თბილისის სახელმწიფო უნივერსიტეტის პირველ კორპუსთან თავს დაესხნენ სტუდენტური მოძრაობა „თავისუფლებისთვის“ დამფუძნებელს, აქტივისტ ნიკო მანაგაძეს, ხოლო 2 ივნისს, ავტობუსის გაჩერებაზე დახვდნენ თბილისის საკრებულოს ოპოზიციონერ წევრს, ცოტნე კობერიძეს.
პოლიციამ დააკავა ანტირუსული აქციების მონაწილე, გორელი ბიზნესმენი იოსებ ბაბაევი. პროკურატურა მისთვის ბრალის წარდგენას იარაღის უკანონო შეძენა-შენახვა-ტარების მუხლით აპირებდა, რაც 2 წლამდე თავისუფლების აღკვეთით ისჯება, თუმცა მოსამართლე ლევან დარბაიძემ უკანონოდ ცნო ყველა საგამოძიებო მოქმედება, ხოლო იარაღი, რომელიც თითქოს ბაბაევის მანქანიდან ამოიღეს, დაუშვებელ მტკიცებულებად მიიჩნია. აქტივისტი ირწმუნება, რომ მას იარაღი ჩაუდეს.
