თბილისის საქალაქო სასამართლოს მოსამართლე ლელა ცაგარეიშვილმა რუსული კანონის საწინააღმდეგო აქციაზე დაკავებულ გურამ ადამიას სიტყვიერი შენიშვნა მისცა. შინაგან საქმეთა სამინისტრო ადამიას წვრილმან ხულიგნობას და პოლიციელის კანონიერი მოთხოვნისადმი დაუმორჩილებლობას ედავებოდა.
ახალი ამბები
მკითხველის რჩეული
- 1 საპატრულო პოლიციამ შშმ პირს მანქანაში ჩააფსმევინა, შსს-ს 10 ათასის გადახდა დაეკისრა
- 2 283 ქოთანი და 7 კგ გამომშრალი მარიხუანა - დიზაინერ რატი რატიანს 15 წელი მიუსაჯეს
- 3 ბანკირის ენერგოპროექტი - გოგნის ქარის ელექტროსადგურისთვის კოლხურ ტყეებს გაჩეხავენ
- 4 სოხუმი მასშტაბური ენერგოკოლაფსის მიზეზად ენგურჰესზე მომხდარ ავარიას ასახელებს
- 5 ნატა ვიბლიანის გაუპატიურების ერთი ეპიზოდი მამის საფლავზე მოხდა - ადვოკატი
- 6 „საეჭვო გარემოება ვერ გამოვლინდა“ - შსს 2014 წელს გაუჩინარებული გურამ დადიანიძის საქმეზე
გურამ ადამია პარლამენტის მიმდებარე ტერიტორიაზე 13 მაისს დააკავეს. პოლიციელებმა მასზე იძალადეს, თავში ურტყამდნენ. ადამიას ჯანმრთელობის მდგომარეობა წინასწარი დაკავების იზოლატორში დამძიმდა, რის გამოც ის საავადმყოფოში გადაიყვანეს.
„ერთი მხრივ, კარგია, რომ მარტო სიტყვიერი გაფრთხილება მომცეს, მაგრამ, მეორე მხრივ, საერთოდ არ მესმის, რა შუაში ვარ ამასთან. ჩემს მიმართ არ ყოფილა არანაირი მტკიცებულება“, - განაცხადა ადამიამ დღევანდელი პროცესის შემდეგ.
მისი ადვოკატის, დიმიტრი ნოზაძის თქმით, სასამართლოს გადაწყვეტილებას სააპელაციო წესით გაასაჩივრებენ.
„საქმეში იდო მხოლოდ ორი პოლიციელის ჩვენება, რომელიც ერთმანეთთან წინააღმდეგობაში მოდიოდა, ვინაიდან აცხადებდნენ, რომ გურამმა სამართალდარღვევა ჩაიდინა ჭიჭინაძის ქუჩაზე, იქ შეამჩნიეს და მისცეს მითითება მისი დაკავების თაობაზე. თუმცა, ის ზუბალაშვილების ქუჩაზე იქნა დაკავებული და პარლამენტის ჭიშკარი, რაზეც უთითებენ ოქმის შემდგენელი პოლიციელები, საერთოდ არ ფიგურებს. სამწუხაროა, რომ ორივე მუხლში არ შეწყდა ადმინისტრაციული წარმოება. მოსამართლემ სიტყვიერი გაფრთხილება გამოიყენა, მაგრამ ესეც ადმინისტრაციული სახდელის ფორმაა,“ - აღნიშნა ადვოკატმა.
ადმინისტრაციულ სამართალდარღვევათა კოდექსის მიხედვით, პირის ადმინისტრაციული პასუხისმგებლობისგან გათავისუფლება და მის მიმართ სიტყვიერი შენიშვნის გამოყენება მცირემნიშვნელოვანი სამართალდარღვევის შემთხვევაშია შესაძლებელი.
ე.წ. „უცხოეთის აგენტების“ შესახებ რუსული კანონის საწინააღმდეგო აქციებზე, ადმინისტრაციული და სისხლის სამართლის წესით, 200-ზე მეტი ადამიანი დააკავეს. მათი უმრავლესობა პოლიციელების მხრიდან ძალის გადამეტებაზე, არასათანადო მოპყრობასა და ფიზიკურ ანგარიშსწორებაზე საუბრობს. საპროტესტო აქციების მიმდინარეობისას შსს-ს სხვადასხვა დანაყოფის თანამშრომლები სასტიკად გაუსწორდნენ ოპოზიციონერ პოლიტიკოსებსა და აქტივისტებს - ალეკო ელისაშვილს, ლევან ხაბეიშვილს, დავით ქაცარავას და სხვებს. სპეციალურმა საგამოძიებო სამსახურმა განაცხადა, რომ სამართალდამცავი ორგანოს თანამშრომლების მხრიდან განხორციელებულ შესაძლო კანონსაწინააღმდეგო ქმედებების თაობაზე ჯამში 138 შეტყობინება მიიღეს. უწყებამ გამოძიება დაიწყო, თუმცა ამ დრომდე პასუხისგებაში არ მიუცია არცერთი პოლიციელი.
