Թբիլիսիում բացվում է ռուսական ռեստորանների ցանցի մասնաճյուղը

«Սիռովարնյա» գաստրոնոմիկ ապրանքանիշը պատկանում է ռուս հայտնի ռեստորատոր Արկադի Նովիկովին և նրա «Նովիկով գրուպ» ընկերությանը։ Նովիկովը գործարար է, ով աջակցում է Ռուսաստանի նախագահ Վլադիմիր Պուտինին։ Նա եղել է Պուտինի վստահելի անձը 2012 և 2018 թվականների նախագահական ընտրությունների ժամանակ։

Ռուսալեզու Smart Press գործակալությունը գրում է, որ Վրաստանում Արկադի Նովիկովի ռեստորանի մասնաճյուղ բացելու մասին խոսակցությունները սկսվել են դեռևս 2023 թվականին, այդ ժամանակվանից ռեստորանի տարածքը վերանորոգվում և վերազինվում էր։ Ռեստորանը գտնվում է հինգ աստղանի հյուրանոցի առաջին հարկում և արդեն աշխատում է թեստային ռեժիմով, սակայն դրա բացման պաշտոնական ամսաթիվը դեռ հայտնի չէ։

2025 թվականին «Սիռովարնյա»-ն կդառնա 10 տարեկան, իսկ Վրաստանը կդառնա աշխարհում վեցերորդ երկիրը՝ Արաբական Միացյալ Էմիրություններից, Հայաստանից, Ղազախստանից, Տաջիկստանից և Ուզբեկստանից հետո, որտեղ կբացվի նրա մասնաճյուղը։

«Պարագրաֆ Թբիլիսին»՝ «Մարիոթի» բարձրակարգ Luxury Collection ապրանքանիշի հյուրանոցը, բացվել է 2023 թվականի նոյեմբերին այն ժամանակվա վարչապետ և «Վրացական երազանքի» ներկայիս նախագահ Իրակլի Ղարիբաշվիլիի կողմից։ Այն գտնվում է «Պանորամա Թբիլիսիի» շենքում, որը կառուցվել է Ամերիկայի Միացյալ Նահանգների կողմից պատժամիջոցների ենթարկված «Վրացական երազանքի» հիմնադիր Բիձինա Իվանիշվիլիի նախաձեռնությամբ։