Ոստիկանությունը խուզարկություն է իրականացրել Դավիթ Կեզերաշվիլիի բնակարանում

«Ֆորմուլա»-ի տեղեկություններով՝ Սոլոլակում, Ամաղլեբայի փողոցում գտնվող բնակարանում ապրում է Կեզերաշվիլիի կնոջ եղբայրը՝ «Միասնություն-Ազգային շարժման» անդամ Դիմա Չիկովանին, թեև նա տանը չի եղել։ Ինչպես հայտնել է լրագրողը, ոստիկանները փորձել են մուտք գործել մասնավոր սեփականություն՝ կոտրելով դուռը։

ՆԳՆ աշխատակիցները քննչական գործողությունների վերաբերյալ պարզաբանում չեն տալիս։

Ինքը՝ Դավիթ Կեզերաշվիլին, ՆԳՆ արարքը կապում է Մարդու իրավունքների եվրոպական դատարանի այսօրվա որոշման հետ, ըստ որի՝ Կեզերաշվիլիի վերաբերյալ գործով խախտվել է Եվրոպական կոնվենցիայի 6-րդ հոդվածի 1-ին մասը՝ անաչառ դատարանի իրավունքը։

«Այնպես է նյարդայնացել այսպես կոչված իշխանությունը Ստրասբուրգի դատարանի որոշումից հետո, որ այս պահին խուզարկում են իմ տունը։ Դե եկեք, տղերք, կպեք գործի, մենք միևնույն է կհաղթենք»,- գրել է Կեզերաշվիլին սոցցանցում։

Երեկ՝ դեկտեմբերի 4-ին, ոստիկանության Կենտրոնականի բաժնի աշխատակիցները խուզարկել են ընդդիմադիր կուսակցությունների գրասենյակները և ակտիվիստների բնակարանները։ Քրեական ոստիկանության տնօրեն Թեյմուրազ Կուպատաձեն պարզաբանել է, որ քննչական գործողություններն իրականացվել են խմբակային բռնություն կազմակերպելու, ղեկավարելու կամ մասնակցելու և բռնի գործողությունների հրապարակայնորեն կոչ անելու փաստի առթիվ շարունակվող հետաքննության շրջանակներում։ Մոտ տասը մարդ ձերբակալվել է։