Լատվիան կոչ է անում ԵՄ երկրներին զբոսաշրջային վիզաներ չտրամադրել Ռուսաստանի քաղաքացիներին

Եվրահանձնաժողովի տվյալներով՝ 2024 թվականին Ռուսաստանի քաղաքացիներին տրվել է 565 069 Շենգենյան վիզա, ինչը 25 տոկոսով ավելի է, քան 2023 թվականին։ Ընդ որում, այդ վիզաների 90%-ը տրվել է զբոսաշրջային նպատակներով։

Ռիհարդս Կոզլովսկիսը հիշեցրել է ԵՄ անդամ երկրների իր գործընկերներին, որ Լատվիան դադարեցրել է զբոսաշրջային վիզաների տրամադրումը Ռուսաստանի քաղաքացիներին 2022 թվականի սկզբին՝ Ուկրաինա Ռուսաստանի ներխուժումից անմիջապես հետո։ Նմանատիպ միջոցառումներ են ձեռնարկել Էստոնիան, Լիտվան, Լեհաստանը և Չեխիան։

«Ստեղծված իրավիճակում մենք չենք կարող սովորականի պես շարունակել մեր գործը։ Մենք պետք է ընդունենք, որ հիբրիդային պատերազմի մեջ ենք։ Լատվիայում դա ազդում է անվտանգության մարմինների ամենօրյա աշխատանքի վրա՝ ինչպես սահմանին, այնպես էլ երկրի ներսում:

Մենք բախվում ենք և՛ սահմանի ապօրինի հատման դեպքերի, և՛ դիվերսիոն գործողությունների, ինչպիսիք են օկուպացիայի թանգարանը հրկիզելը, անօդաչու սարքերով սահմանը հատելը, հանրային կարծիքի վրա ազդելու քարոզչական փորձերը և այլն։ Ուստի ես կոչ եմ անում բոլոր անդամ պետություններին լրջորեն վերաբերվել այս սպառնալիքին: Մեր բարոյական պարտքն է հրաժարվել նման ծառայություններից»,- ասել է Լատվիայի ներքին գործերի նախարարը։

Ընդհանուր առմամբ, 2024 թվականին Ռուսաստանի քաղաքացիներին տրված վիզաները կազմել են Շենգենյան գոտում տրված բոլոր վիզաների 5,7%-ը։

Եվրամիության ներքին գործերի և միգրացիայի հարցերով հանձնակատար Մագնուս Բրունները մտահոգություն է հայտնել ստեղծված իրավիճակի վերաբերյալ և կոչ է արել անդամ երկրներին միավորվել Շենգենյան վիզաների տրամադրման հարցում։ Այս թեման կարող է քննարկվել նաև ներքին գործերի նախարարների խորհրդի հաջորդ նիստում։