«Կվարելիի լճի» մոտ տեղի ունեցած ակցիայի ժամանակ առնվազն 16 մարդ է ձերբակալվել

Ինչպես հայտնել է ակտիվիստ Գիորգի Մումլաձեն, ձերբակալվածների թվում են Նիկա Նարսիան, Լաշա Խուսկիվաձեն, Դիմիտրի Չիքովանին, Տիտե Գեդենիձեն և Շուշանա Մացաբերիձեն։ Նրանց մեղադրանք է առաջադրվել ոստիկանությանը չենթարկվելու համար։

«Մենք մնում ենք այստեղ։ Մենք հնարավորինս մոբիլիզացված ենք, որպեսզի կարողանանք չեղարկել նրանց տոնակատարությունը, ինչը վիրավորական է վրաց ժողովրդի համար»,- ասել է Մումլաձեն լրատվամիջոցներին։

Ներքին գործերի նախարարությունը ձերբակալվածների մասին տեղեկություն չի հրապարակում։

«Կվարելիի լճի» մոտ մոբիլիզացվել են ՆԳՆ հատուկ հանձնարարությունների վարչության և ոստիկանության այլ ստորաբաժանումների ներկայացուցիչները։ «Ազգային շարժում» կուսակցության նախկին նախագահ Նիկա Մելիային առավոտյան ժամը 5-ի սահմաններում հաջողվել է հասնել հյուրանոցի շենքի մուտքի մոտ։ Ոստիկանության աշխատակիցները բռնել են նրան և խնդրել հեռանալ համալիրի տարածքից։ Թբիլիսիի քաղաքային խորհրդի անդամ Իրակլի Էձգվերաձեն ձերբակալվել է։ Մի քանի անգամ Մելիայի և ոստիկանապետերի միջև վիճաբանություն է տեղի ունեցել, որի ժամանակ ոստիկանության ավագ սպա Գիորգի Կլիմիաշվիլին Մելիային անվանել է քաղաքական դիակ։

Երեկ երեկոյան մամուլում տեղեկություն է տարածվել, որ Սերգեյ Լավրովի փեսայի եղբայրը՝ Մոշե Վինոկուրովը հարսանիքը նշում է «Կվարելիի լճում»։ Ըստ «Մթավարի արխի»-ի՝ Կախեթիում են գտնվում նաև Լավրովի դուստրը՝ Եկատերինա Վինոկուրովան [Լավրովան] և փեսան՝ Ալեքսանդր Վինոկուրովը։ Նրանք երկուսն էլ պատժամիջոցների են ենթարկվել Եվրամիության, Մեծ Բրիտանիայի և մի շարք այլ երկրների կողմից։

Հյուրանոցային համալիրի ադմինիստրացիան հայտարարել է, որ «Կվարելիի լիճ» Լավրովի դստեր այցի մասին տեղեկությունը չի համապատասխանում իրականությանը։ Նրանց խոսքով, հյուրանոցում Լավրով ազգանունով հյուր չկա, մինչ այժմ էլ չի եղել։

Վրաստանի ոչ մի պաշտոնական գերատեսչություն մինչ այժմ չի մեկնաբանել այս հարցը։