Ձյուդոիստ Լաշա Բեքաուրիի մոտ գտնվող առյուծի ձագը հանձնվել է կենդանաբանական այգուն

«Այսօր առավոտ բերեց ու մեզ նվիրեց»,- ասել է Գուրիելիձեն՝ նշելով, որ այս գործընթացին ներկա է եղել նաև շրջակա միջավայրի պահպանության նախարարության ներկայացուցիչը։

Թբիլիսիի կենդանաբանական այգու ղեկավարի խոսքով՝ Բեքաուրին չի ասել, թե որտեղից է ձեռք բերել առյուծի ձագին։

«Նա չի ասել, թե որտեղից է, ինչպես է: Դեպքի մասին տեղյակ է բնապահպանության նախարարությունը, որի ներկայացուցիչը ներկա է եղել այս ամենին։ Իհարկե, մենք չենք կարող [կենդանին] ընդունել մասնավոր անձից, անկախ նրանից, թե ով է նա, եթե պետական ​​կազմակերպությունը ներգրավված չէ»,- ասել է Գուրիելիձեն «Պիրվելի» հեռուստաընկերությանը տված հարցազրույցում։

Դեկտեմբերի 24-ին Լաշա Բեքաուրին Instagram սոցիալական ցանցում տեսանյութ է հրապարակել, որտեղ երևում է, որ նա վարում է սեփական Porsche մեքենան ու շոյում առյուծի ձագին՝ կողային նստատեղին։

Հայտնի չէ, թե ինչպես է առյուծի ձագը հայտնվել Վրաստան։ Վայրի կենդանու ներմուծման համար անհրաժեշտ է ունենալ հատուկ թույլտվություն՝ տեղեկանք, որը տրվում է այն երկրի կողմից, որտեղից հեռանում է կենդանին։ Ապօրինի ներմուծումը Վրաստանի օրենսդրությամբ հանցագործություն է և քրեական օրենսգրքով պատժվում է երկուսից չորս տարի ազատազրկմամբ:

Չնայած բազմաթիվ դիմումներին՝ ոչ բնապահպանության նախարարությունը, ոչ էլ եկամուտների ծառայությունը չեն մեկնաբանել այս հարցը։