«Երազանքի» արդարադատության փոխնախարար Էրեկլե Ղվինիանիձեն հրաժարական է տվել

Էրեկլե Ղվինիանիձեն արդարադատության փոխնախարարի պաշտոնը զբաղեցնում էր 2022 թվականից։ Մինչ այդ, նա տարիներ շարունակ աշխատել է ՀԻԻԱ «Հարկադիր կատարման ազգային բյուրոյում»՝ 2012 թվականից մինչև 2021 թվականը եղել է մասնավոր կատարող, իսկ դրանից հետո՝ մոտ մեկ տարի, աշխատել է որպես «Հարկադիր կատարման ազգային բյուրոյի» նախագահ։

Անրի Օխանաշվիլին ներկայումս ունի չորս տեղակալ՝ Լևան Խարանաուլին, Իրակլի Բերաիան, Բեքա Ձամաշվիլին և Նիկո Թաթուլաշվիլին։

Էրեկլե Ղվինիանիձեն եղել է նաև Արդարադատության տան կուրատորը։ Վերջին երկու ամսվա ընթացքում Արդարադատության տներից տասնյակ աշխատակիցներ հեռացվել են եվրաինտեգրման գործընթացի կասեցմանը դեմ արտահայտվելու համար։ Ազատվածների թվում են տարբեր գերատեսչությունների ղեկավարներ և շարքային աշխատակիցներ, ինչպես նաև Ռուսթավիի և Բաթումիի Արդարադատության տների ղեկավարները։

Նոյեմբերի 28-ին ոչ լեգիտիմ վարչապետ Իրակլի Կոբախիձեն ասել է, որ «Վրացական երազանք» կուսակցությունը մինչև 2028 թվականի վերջը օրակարգ չի մտցնի Եվրամիությանը Վրաստանի անդամակցության շուրջ բանակցություններ սկսելու հարցը։

Նոյեմբերի 29-ին Արդարադատության տան աշխատակիցները համատեղ հայտարարություն են տարածել։ Նրանք քննադատել են «Վրացական երազանքի» որոշումը՝ հայտարարելով, որ «Վրաստանի եվրաինտեգրման կասեցումը դուրս է քաղաքական ճաշակի հարցից, այն ակնհայտորեն հակասում է Վրաստանի Սահմանադրությանը և մեր երկրի բնակչության մեծամասնության հայտարարված նպատակին»։ Հայտարարության տակ ստորագրել է ավելի քան 600 մարդ։