Դեսպանի խոսքով՝ «Վրացական երազանքը» Թրամփին ուղարկել է սպառնալից, վիրավորական և անլուրջ նամակ

«Ազատություն» ռադիոկայանի հետ բացառիկ հարցազրույցում Դանիգանն ասել է, որ ցանկանում էր հանդիպել «Վրացական երազանքի» պատվավոր նախագահ Բիձինա Իվանիշվիլիին՝ պետքարտուղար Մարկո Ռուբիոյի պատասխանը փոխանցելու համար, սակայն Իվանիշվիլին ասել է «ոչ»։

«Ես գնացի Վաշինգտոն Թրամփի վարչակազմի սկզբում՝ հանդիպելու նոր վարչակազմի բարձրաստիճան պաշտոնյաների հետ, խոսելու Վրաստանի նկատմամբ մեր քաղաքականության մասին՝ որն էր լինելու Վրաստանի կառավարությանն ուղղված մեր առաջին ուղերձը։

Ես վերադարձա և հանդիպեցի արտաքին գործերի նախարար [Մակա Բոճորիշվիլի] հետ, և ես շատ հստակ ներկայացրի երկու կամ երեք քայլ, որոնք «Վրացական երազանքը» կարող է ձեռնարկել հարաբերությունները վերականգնելու համար։ Երեք օր անց՝ և կրկին կասեմ սա, ես սովորաբար խոսում եմ այս մասին, բայց վարչապետն ինքն է ասել դա՝ «Վրացական երազանքի» ղեկավարությունը ինձ նամակ ուղարկեց՝ ուղղված Թրամփի վարչակազմին։ Անձնական նամակ։

Սա հրապարակային նամակ չէ, որը, անկեղծ ասած, սպառնալից, վիրավորական, անլուրջ էր, և այն չափազանց վատ ընդունվեց Վաշինգտոնում։ Շատ վատ։ Այսպիսով, մեզ որոշ ժամանակ պահանջվեց պատասխանի մասին մտածելու համար։ Սա է ճշմարտությունը։ Եվ կարծում եմ, որ մեզ որոշ ժամանակ պահանջվեց, քանի որ մարդիկ շատ զարմացած էին, որ մի երկիր նման նամակ կարող է ուղարկել իմ երկրին։

Մինչդեռ, մինչ մենք մտածում էինք պատասխանի մասին, վարչապետը հրապարակեց բաց նամակ։ Այնուհետև ես գնացի վարչապետի մոտ և ասացի նրան, որ ես պատասխան եմ ստացել պետքարտուղար Ռուբիոյից, որը խնդրել է ինձ այն փոխանցել Բիձինա Իվանիշվիլիին: Բիձինա Իվանիշվիլին ասաց՝ «ոչ»: Ես ուրախ կլինեի հանդիպել վարչապետի հետ ցանկացած պահի: Նա հատուկ չի խնդրել հանդիպել ինձ հետ, բայց ինձ ասացին, որ Թրամփի վարչակազմի նամակը ուղարկվել է անձամբ Բիձինա Իվանիշվիլիին, և նա ասել է՝ «ոչ»: Ինձ չեն խնդրել այն տալ վարչապետին», - ասել է դեսպանը, որը հուլիսին անձնական որոշմամբ լքում է Վրաստանը։

Հարցին, թե Վաշինգտոնում հարցրե՞լ է, թե ինչու պետք է պատասխանը տրվի Բիձինա Իվանիշվիլիին, այլ ոչ թե Իրակլի Կոբախիձեին, Ռոբին Դանիգանն ասել է.

«Կարծում եմ՝ աշխարհի մարդկանց մեծ մասը գիտի, որ կառավարությունը ղեկավարում է Բիձինա Իվանիշվիլին: Ամենատարօրինակն այն է, որ այն, ինչ նա խնդրում է՝ հարաբերությունները ճիշտ ուղու վրա դնելը, այդքան էլ դժվար չէ։

Առաջին քայլերից մեկը պետք է լինի հակաամերիկյան հռետորաբանության դադարեցումը: Գիտեք: Ասել բաներ, որոնք իրականությանը չեն համապատասխանում: «Վրացական երազանքը» շատ բաներ է ասում Միացյալ Նահանգների մասին, որոնք իրականությանը չեն համապատասխանում. որ մենք փորձում էինք այստեղ երկրորդ ճակատ բացել՝ դա իրականությանը չի համապատասխանում, որ իմ նախորդը փորձում էր այստեղ հեղափոխություն սկսել՝ դա ճիշտ չէ։ Որ մեր ռազմավարական գործընկերությունը միայն թղթի վրա գործընկերություն է, դա ճիշտ չէ։ Որ ինձ կանչել է իմ կառավարությունը, դա ճիշտ չէ։ Ես կարող եմ անվերջ շարունակել»։

Մայիսի 28-ին ԱՄՆ դեսպանությունը հայտարարություն տարածեց, որում նշվում էր, որ պետքարտուղար Ռուբիոյի խնդրանքով դեսպան Դանիգանը հանդիպում է խնդրել Իվանիշվիլիի հետ, սակայն վերջինս մերժել է։ Իվանիշվիլիի պատասխանում նշվում էր, որ դեսպանին առաջարկվել է հանդիպում Իրակլի Կոբախիձեի հետ, որը նա մերժել է։ «Հետևաբար, ինձ հետ հանդիպման խնդրանքի միակ բացատրությունն այն է, որ հանդիպումն արժեք ունի միայն անձնական շանտաժի համատեքստում», - գրել էր Բիձինա Իվանիշվիլին։

Ավելի վաղ՝ մայիսի 13-ին, «Վրացական երազանքի» վարչապետ Իրակլի Կոբախիձեն բաց նամակ էր հղել Դոնալդ Թրամփին՝ արտահայտելով իր դժգոհությունը Վրաստանի և ԱՄՆ կառավարությունների միջև ամենաբարձր մակարդակով հաղորդակցության բացակայության վերաբերյալ։ Կոբախիձեն նաև գրել էր, որ Թրամփի վարչակազմը անտեսել է մի քանի շաբաթ առաջ իր գրած նամակը վրաց-ամերիկյան հարաբերությունների վերաբերյալ, ինչպես նաև հրապարակային հայտարարությունները, որոնք արտահայտում էին հարաբերությունները մաքուր էջից վերականգնելու պատրաստակամություն։