Դե ֆակտո Աբխազիան «Վրացական երազանքին» հիշեցրել է ներողություն խնդրելու մասին Իվանիշվիլիի հայտարարությունը

Այս անգամ Սոխումին արձագանքել է Վրաստանի քաղաքացիական ավիացիայի գործակալության հայտարարությանը, ըստ որի գործակալությունը համակարգում է Քաղաքացիական ավիացիայի միջազգային կազմակերպության (ICAO) հետ, որպեսզի, Սոխումիի օդանավակայանից թույլ չտա, այսպես կոչված, միջազգային թռիչքներ իրականացնել։

«Վրացի քաղաքական գործիչների վերջին հայտարարությունների լույսի ներքո Աբխազիայի Հանրապետության և Հարավային Օսիայի հետ կառուցողական երկխոսության պատրաստակամության մասին, այդ թվում՝ «Վրացական երազանք» իշխող կուսակցության նախագահ Բիձինա Իվանիշվիլիի հայտարարությունն այն մասին, որ «Վրաստանը պետք է ներողություն խնդրի օսական կողմից 2008 թվականի համար և պատժի նախկին իշխող կուսակցությանը», Աբխազիայի Հանրապետությունը ակնկալում էր պրագմատիկ փոխգործակցության սկիզբ՝ հիմնված Անդրկովկասում ստեղծված իրողությունների ճանաչման վրա»,- հայտնել են դե ֆակտո ԱԳՆ-ից։ 

Սակայն, ինչպես նշվում է հայտարարության մեջ, հարաբերությունների կարգավորմանն ուղղված պրագմատիկ մոտեցման փոխարեն Վրաստանի կառավարությունը շարունակում է շաբլոնային, քաղաքական դրդապատճառներով և իրականությունից կտրված հայտարարություններ անել, ինչը միայն լրացուցիչ լարվածություն է ստեղծում։

«Վրացական ղեկավարության վերջին պոռթկումները փորձ են հետաձգել գործընթացները, որոնք անշրջելի են», - նշել են, այսպես կոչված, նախարարությունից:

Օկուպացված Աբխազիայի և Ռուսաստանի Դաշնության միջև կանոնավոր օդային հաղորդակցությունը նախատեսվում է սկսել մայիսի 1-ից: Մոսկվայի «Վնուկովո» օդանավակայանից մինչև Սոխումիի, այսպես կոչված, միջազգային օդանավակայան փորձնական թռիչքն իրականացվել է փետրվարի 7-ին։ «Վրացական երազանքի» արտաքին գործերի նախարարությունը մարտի սկզբին արձագանքել է  օդանավակայանի բացմանը և «անհանգստություն հայտնել» Ժնևում միջազգային քննարկումների 63-րդ փուլի շրջանակներում։

Մարտի 14-ին BMG-ի հարցին ի պատասխան՝ Վրաստանի քաղաքացիական ավիացիայի գործակալությունը հայտարարել է, որ Սոխումիի օդանավակայանի շահագործումն անօրինական է, և որ օտարերկրյա ավիաընկերությունը, որը թռիչքներ կիրականացնի դեպի օկուպացված Աբխազիա, կխախտի «Միջազգային քաղաքացիական ավիացիայի մասին» Չիկագոյի կոնվենցիան։