Դատախազությունը հարցաքննության է կանչել Մամուկա Խազարաձեին և Զուրաբ Ջափարիձեին

«Ինձ զանգահարել են գլխավոր դատախազությունից, որպես վկա կանչում են հարցաքննության, ես կգնամ ընտրակեղծիքների ապացույցներով հանդերձ, տեսնեմ՝ ինչպե՞ս կպահի իրեն Բիձինայի հնազանդ դատախազությունը։ Մենք հաղթելու ենք ամենուր»,- Facebook-ում գրել է «Ուժեղ Վրաստան» կոալիցիայի հիմնադիր Մամուկա Խազարաձեն։

Նոյեմբերի 6-ին, ժամը 13:00-ին հարցաքննության է կանչվել նաև «Հանուն փոփոխությունների կոալիցիայի» առաջնորդներից Զուրաբ Ջափարիձեն։ Հայտնի չէ՝ նա կգնա քննչական մարմին, թե ոչ։

Կենտրոնական ընտրական հանձնաժողովը հոկտեմբերի 29-ին հայտարարել է, որ նախագահի և ընդդիմադիր քաղաքական կուսակցությունների ներկայացուցիչների կողմից ընտրությունների «ենթադրյալ կեղծիքի» մեղադրանքներն արդեն լայն մասշտաբներ են ստացել, ինչը «համալիր և օբյեկտիվ քննություն է պահանջում»։ Հենց հաջորդ օրը դատախազությունը քրեական գործ է հարուցել ընտրակեղծիքների հոդվածով, և առաջինը, ով հրավիրվել է հարցաքննության, եղել է նախագահ Սալոմե Զուրաբիշվիլին։ Զուրաբիշվիլին հրաժարվել է գնալ դատախազություն և կոչ է արել քննչական մարմնին «նախագահի հետ քաղաքական հաշիվներ մաքրելուց զերծ մնալ»։

Հարցաքննության է կանչվել նաև «Գախարիան հանուն Վրաստանի» կուսակցության փոխնախագահ Նաթիա Մեզվրիշվիլին։ Նրա խոսքով՝ նշված հետաքննությունը «կեղծ» է, և դրա նպատակը միայն պարզելն է, որ ընտրությունները չեն կեղծվել։ Ըստ այդմ՝ Մեզվրիշվիլին չի պատրաստվում ներկայանալ քննչական մարմին։ Նույն որոշումն է կայացրել դիտորդական կազմակերպությունների կոալիցիայի՝ «Իմ ձայնի» մամուլի խոսնակ Լոնդա Թոլորաիան։

Վրաստանի Կենտրոնական ընտրական հանձնաժողովի տվյալներով՝ հոկտեմբերի 26-ին կայացած խորհրդարանական ընտրություններում «Վրացական երազանքը» ստացել է ձայների 53,93 տոկոսը։ Այս արդյունքի լեգիտիմությունը չեն ճանաչում ընտրական շեմը հաղթահարած ընդդիմադիր կուսակցությունները, որոնց միջև ձայները բաշխվել են հետևյալ կերպ.

• «Կոալիցիա հանուն փոփոխությունների» - (11.037%)
• «Միասնություն-Ազգային շարժում» - (10․164%)
• «Ուժեղ Վրաստան» - (8․814%)
• «Գախարիան հանուն Վրաստանի» - (7․771%)

Նախագահ Սալոմե Զուրաբիշվիլին նույնպես կարծում է, որ ընտրությունները «ամբողջովին կեղծվել են», իսկ Վրաստանը «ռուսական հատուկ գործողության» զոհ է դարձել։