Բաթումիի ցույցերի դրոշակակիր Թեմուր Քաթամաձեն ազատ արձակվելուց հետո կրկին ձերբակալվել է

Թեմուր Քաթամաձեն առաջին անգամ ձերբակալվել է հունվարի 11-ին Սահմանադրական դատարանի մոտ տեղի ունեցած ցույցի ժամանակ՝ ոստիկանի պահանջին չենթարկվելու պատրվակով, իսկ հունվարի 13-ին դատավոր Իրմա Տոգոնիձեն նրան դատապարտել է 5-օրյա վարչական կալանքի։ Թեմուր Քաթամաձեն լքում էր ժամանակավոր պահման կենտրոնը, երբ երկրորդ անգամ ձերբակալվեց։

«Գախարիան հանուն Վրաստանի» կուսակցությունից Բաթումիի քաղաքային խորհրդի անդամ Ակակի Գանիձեն հրապարակել է ձերբակալության կադրերը։ Տեսանյութում ՆԳՆ ներկայացուցիչը Քաթամաձեին բացատրում է, որ նա կալանավորված է ներգաղթի օրենսդրության համաձայն։ Թեմուր Քաթամաձեն ասում է, որ ձերբակալությունը կապված է «հավանաբար Վրաստանում գտնվելու ժամկետը երկարաձգելու հետ»։

Բաթումիի ակտիվիստ Ցիալա Քաթամիձեի խոսքով՝ Բաթումիի ոստիկանապետ Իրակլի Դգեբուաձեն իրեն ասել է, որ ինքը «ամեն դեպքում երկրից դուրս կշպրտի Թեմուր Քաթամաձեին»։ Հունվարի 11-ին ձերբակալվածների թվում էր նաև Ցիալա Քաթամիձեն։

«Իմ սենյակ մտած Իրակլի Դգեբուաձեն ինձ ասաց մեր դրոշակակիրի մասին՝ եթե ոչինչ չանեմ, ես այդ «թուրքին» դուրս կշպրտեմ երկրից։

Ասացի, որ նա թուրք չէ, մուհաջիր է։ Ասաց նա թուրք է, իսկ Թուրքիան Ռուսաստանից ավելի մեծ թշնամի է մեր երկրի համար։ Նա այնպես նայեց ինձ, որ ոչ մի բառ չի կարող նկարագրել և արտացոլել, այս դեմքը կոչվում է «Իրակլի Դգեբուաձե»»,- գրել է Քաթամիձեն Facebook-ում։

Մուհաջիրների ժառանգ 56-ամյա Թեմուր Քաթամաձեն (Գաֆար Յըլմազ) 2012 թվականից ապրում և աշխատում է Վրաստանում, սակայն, չնայած բազմաթիվ փորձերին, դեռ չի ստացել Վրաստանի քաղաքացիություն։

Թեմուր Քաթամաձեն բողոքի ցույցերին մասնակցում է Վրաստանի դրոշով, ինչի պատճառով էլ հայտնի է որպես «դրոշակակիր»։