Զարմանալի և ցավալի է, որ ավելացել է խաղային բիզնեսի շրջանառությունը. Ղարիբաշվիլի

Վարչապետի խոսքով, նախորդ տարվա փոփոխություններով արգելվել է խաղային բիզնեսի գովազդը, իսկ մինչև 25 տարեկան քաղաքացիներին արգելվել է մասնակցել խաղային բիզնեսին, սակայն, «չնայած դրան, բավականին շատ քաղաքացիներ են զբաղվում խաղային բիզնեսով»։

Ղարիբաշվիլին նշել է, որ կառավարությունը նախատեսում է խաղային բիզնեսից գանձել ևս 400 մլն լարի։

«Խորհրդարանական մեծամասնությանը ներկայացնում ենք նոր նախաձեռնություն։ Մեզ անհրաժեշտ է փոխել խաղային բիզնեսի հարկման դրույքաչափերը և, ըստ ծրագրի, նոր նախաձեռնությամբ խաղային բիզնեսը կհարկվի շահույթի 15%-ի չափով, ներկայիս 10%-ի փոխարեն, իսկ խաղայի բիզնեսից գումարի կանխիկացումը կհարկվի 5%-ով՝ ներկայիս 2%-ի փոխարեն։

Ուզում եմ հանրությանը տեղեկացնել նաև, որ նշված փոփոխությունները բյուջե են բերելու լրացուցիչ 400 մլն լարի։ 300 միլիոնը բանկերից, 400 միլիոնը՝ խաղային բիզնեսից այս փոփոխության արդյունքում, 2024 թվականին կունենանք ընդհանուր առմամբ 700 միլիոն հավելյալ եկամուտ։

Այստեղ մի կողմից ուզում եմ զարմանք հայտնել, մյուս կողմից շատ ցավալի է, որ խաղային բիզնեսի շրջանառությունն ավելանում է։ Ես իսկապես ուրախ չեմ, շատ քաղաքացիներ դեռևս զբաղված են խաղային բիզնեսով»,- ասել է Իրակլի Ղարիբաշվիլին։

Անցյալ տարի խորհրդարանն ընդունեց կառավարության առաջարկած փոփոխությունները և ամբողջությամբ արգելեց ազարտային խաղերի հեռուստատեսային գովազդը։ Հեռուստաընկերությունները կոմերցիոն եկամուտների 20-25%-ը ծածկում էին ազարտային խաղերի բիզնեսի գովազդով և հովանավորչական փաթեթներ վաճառելով։ Արգելքը վատթարացրել է հեռուստատեսային լրատվամիջոցների ֆինանսական վիճակը։

Օրենքի փոփոխությունները մտցրեցին այլ սահմանափակումներ՝ խաղացողների նվազագույն տարիքը 18-ից բարձրացվեց 25 տարեկանի, իսկ խաղալու իրավունքն ամբողջությամբ արգելվեց հանրային ծառայություններում աշխատող և սոցիալապես անապահով անձանց համար։ Կառավարության տվյալներով՝ սահմանափակումը վերաբերում է մինչև մեկ միլիոն Վրաստանի քաղաքացու։