«Վրացական երազանքի» ճնշող մարտավարությունը երկիրը կթողնի մեկուսացման մեջ. Պետդեպարտամենտ

«Մենք խստորեն դատապարտում ենք բռնությունը Վրաստանի խաղաղ բնակիչների, ցուցարարների, լրագրողների և ընդդիմության ներկայացուցիչների, այդ թվում՝ Վրաստանի նախկին վարչապետ Գախարիայի նկատմամբ։

Սա «Վրացական երազանքի» ճնշող մարտավարության ևս մեկ օրինակ է, որը երկիրը կթողնի մեկուսացման մեջ»,- ասել է ԱՄՆ Պետդեպարտամենտի խոսնակ Մեթյու Միլլերը։

Հունվարի 15-ին, ուշ գիշերին, լրագրող Զվիադ Քորիձեն և «Հանուն Վրաստանի» կուսակցության առաջնորդ, նախկին վարչապետ Գիորգի Գախարիան բռնության են ենթարկվել «Վրացական երազանքի» ներկայացուցիչների, այդ թվում՝ ոչ լեգիտիմ խորհրդարանի պատգամավոր Դիմիտրի Սամխարաձեի և Աջարիայի ֆինանսների և էկոնոմիկայի փոխնախարար Գիորգի Մանվելիձեի կողմից։ Ներքին գործերի նախարարությունը հետաքննություն է սկսել Քրեական օրենսգրքի 126-րդ հոդվածով, որը վերաբերում է բռնությանը, սակայն մինչ օրս ձերբակալվածներ չկան։

Քորիձեի և Գախարիայի վրա հարձակումը տեղի է ունեցել անդադար անցկացվող բողոքի ակցիաների մասնակիցների ձերբակալությունների ու կալանավորումների ֆոնին։

Ապօրինի բերման ենթարկվածների թվում է «Բաթումելեբի» և «Նեթգազեթի» առցանց լրատվամիջոցների ղեկավար Մզիա Ամաղլոբելին։ «Վրացական երազանքի» դատախազությունը նրան մեղադրում է ոստիկանի նկատմամբ բռնություն գործադրելու մեջ, որը պատժվում է 4-ից 7 տարի ազատազրկմամբ։