«Թբիլիսի մոլի» մոտ ոստիկանությունը ձերբակալել է ցուցարարների, այդ թվում՝ քաղաքական գործիչների

Ներքին գործերի նախարարության տարբեր ստորաբաժանումների աշխատակիցները թույլ չեն տվել ցուցարարներին փակել ճանապարհը, ինչի պատճառով իրավիճակը պարբերաբար լարվել է։ Ծեծկռտուքի և հրմշտոցի ժամանակ, հավանաբար, վիրավորվել է «Պիրվելի» հեռուստաընկերության օպերատոր Նիկա Կոկաիան, ով լուսաբանում էր իրադարձությունները։ Շտապօգնության բրիգադը նրան տեղափոխել է հիվանդանոց։

«Թբիլիսի մոլի» մոտ նախատեսված ակցիայի համար քաղաքացիները սկսել են հավաքվել ժամը 16:00-ից: Ավելի վաղ ՆԳՆ-ն առևտրի կենտրոնի և Ազատ համալսարանի մոտ, որտեղից պետք է երթ անեին ուսանողները, մեծ թվով աշխատակիցների է մոբիլիզացրել տարբեր ստորաբաժանումներից, այդ թվում՝ հատուկ նշանակության ջոկատներից։ Տեղում է գտնվել նաև Հատուկ առաջադրանքների վարչության տնօրեն Զվիադ Խարազիշվիլին, նույն ինքը՝ «Խարեբան»։

Այս պահին բողոքի ակցիայի մասնակիցների մի մասը երթով շարժվում է դեպի Թբիլիսիի քաղաքային դատարան։

Ներքին գործերի նախարարությունը ձերբակալվածների մասին տեղեկություն չի հրապարակում։

Այսօրվա բողոքի ակցիային նախորդել են երեկ՝ փետրվարի 1-ին, ներքին գործերի նախարարության խուզարկությունները քաղաքացիական ակտիվիստների, այդ թվում՝ ֆեյսբուքյան խմբի ադմինիստրատորներ Իլիա Ղլոնտիի և Նենսի Վոլանդի, ինչպես նաև Իսակո Դևիձեի տներում։ Իսակո Դևիձեն ենթարկվել է վարչական կալանքի։ Ոստիկանական բաժանմունքում հարցաքննությունն ավարտելուց հետո Իլիա Ղլոնտին հայտարարել է, որ խուզարկության պատճառը այսօրվա հանրահավաքի մասին իր տարածած գրառումն է։

Բողոքի ակցիայի նախաձեռնությունից հետո՝ հունվարի 31-ին, «Վրացական երազանքի» կառավարությունը հապճեպ ընդունել է նոր կանոնակարգ, որով ռազմավարական նշանակության օբյեկտների ցանկում ներառվել են միջազգային մայրուղիները, ինչպիսիք են, օրինակ՝ դեպի Թբիլիսի մուտքը/ելքը և դրանց արգելափակումը կպատժվի քրեական օրենսգրքով։

Մինչ բողոքի ակցիան ՆԳՆ-ն քաղաքացիներին զգուշացրել է, որ «Թբիլիսի մոլի» դիմաց խմբակային ճանապարհ փակելը հանցագործություն է և պատժվում է 2-ից 4 տարի ազատազրկմամբ։