Սկսվել է առաջին դասարանցիների համընդհանուր գրանցումը

Գրանցումն իրականացվում է կրթության կառավարման տեղեկատվական համակարգի register.emis.ge կայքում։ Գրանցումը պետք է իրականացնի ծնողը/օրինական ներկայացուցիչը։ Էլեկտրոնային եղանակով գրանցված աշակերտի ընդունելության համար անհրաժեշտ փաստաթղթերի ներկայացումը կիրականացվի հունիսի 26-ից հուլիսի 12-ը։ Նշված ժամկետում փաստաթղթերը չներկայացնելու դեպքում գրանցումը կչեղարկվի։

Այն աշակերտները, որոնք չեն գրանցվել I, II և III փուլերում, կամ որոնք ցանկանում են փոխել իրենց գրանցումը, դպրոցներում կգրանցվեն IV փուլում՝ հուլիսի 17-ից հուլիսի 28-ն ընկած ժամանակահատվածում՝ մնացած ազատ տեղերում կամ նախորդ փուլերում ազատված տեղերում։

Չորրորդ փուլում աշակերտի գրանցումն իրականացնում է հանրակրթական դպրոցը՝ ծնողի/օրինական ներկայացուցչի կողմից ներկայացված անհրաժեշտ փաստաթղթերի հիման վրա։

Առաջին դասարան ընդունվելու համար անհրաժեշտ փաստաթղթերը.

• Աշակերտի օրինական ներկայացուցչի հայտարարությունը, որը պետք է պարունակի տեղեկություն օրինական ներկայացուցչի բնակության վայրի և հեռախոսահամարի մասին և պետք է համապատասխանի Վրաստանի ընդհանուր վարչական օրենսգրքի 78-րդ հոդվածով սահմանված այլ պահանջներին, օրինական ներկայացուցչի անձը հաստատող փաստաթղթի պատճենը և Վրաստանում բնակությունը հաստատող փաստաթղթի (առկայության դեպքում) պատճենը: Փաստաթղթերը օտար լեզվով ներկայացնելու դեպքում դրանք պետք է ուղեկցվեն վրացերեն թարգմանությամբ՝ Վրաստանի օրենսդրությամբ սահմանված կարգով:
• Աշակերտի ծննդյան վկայականի կամ անձը հաստատող փաստաթղթի պատճենը և Վրաստանում բնակությունը հաստատող փաստաթղթի պատճենը (առկայության դեպքում): Փաստաթղթերը օտար լեզվով ներկայացնելու դեպքում դրանք պետք է ուղեկցվեն վրացերեն թարգմանությամբ՝ Վրաստանի օրենսդրությամբ սահմանված կարգով:

Վրաստանի կրթության և գիտության նախարարությունը հորդորում է ծնողներին ուշադիր ծանոթանալ գրանցման պայմաններին, որպեսզի կարողանան երեխային ժամանակին և առանց խնդիրների գրանցել դպրոցում: