Լրահոս

Բաց կառավարման գործընկերությունը հրապարակել է առաջարկություններ՝ ուղղված Վրաստանի քաղաքացիական հասարակության կողմից բարձրացված մտահոգություններին` կապված «օտարերկրյա ազդեցության թափանցիկության» օրենքի ներդրման և ժողովրդավարության ավելի լայն էրոզիայի, քաղաքացիական տարածքի փակման և հիմնարար իրավունքների և ազատությունների ոտնահարման հետ:

OGP չափորոշիչների և ստանդարտների ենթահանձնաժողովի քաղաքացիական հասարակության համանախագահ Լյուսի Մաքտերնանը ուշադրություն է հրավիրել ռուսական օրենք վրա։

«Այս օրենսդրությունը բացասական ազդեցություն կունենա քաղաքացիական հասարակության խմբերի և նրանց գործունեության ազատության վրա: Մենք դատապարտում ենք այս օրենսդրության առաջընթացը և կոչ ենք անում Վրաստանին ձեռնպահ մնալ այնպիսի օրենքների ընդունումից, որոնք դեմ են քաղաքացիների ճնշող մեծամասնության ցանկություններին»,- ասել է Լյուսի Մաքտերնանը։ Նա նաև նշել է, որ ոչ պակաս մտահոգիչ են լրագրողների դեմ հարձակումները, լրատվամիջոցների անկախությունը։

OGP-ն կոչ է անում Վրաստանի կառավարությանը մշակել 6 ամսվա հստակ աշխատանքային պլան, որը պետք է ներառի.

• Խտրական օրենսդրության չեղարկում. անհապաղ վերանայել և ետ կանչել ցանկացած օրենսդրություն, որը խոչընդոտում է քաղաքացիական հասարակության կազմակերպությունների, լրատվամիջոցների ներկայացուցիչների և խոցելի խմբերի արտահայտվելու և միավորվելու ազատությանը: Այսպիսին է «Օտարերկրյա ազդեցության թափանցիկության մասին» օրենքը։
• Միավորումների և մամուլի ազատության պաշտպանություն. այնպիսի միջավայրի ապահովում, որտեղ քաղաքացիական հասարակության կազմակերպությունները և լրագրողները կարող են աշխատել առանց վախի, ահաբեկման կամ բռնության, հատկապես ընտրությունների ժամանակ:
• Տեղեկատվության հասանելիության բարձրացում. գոյություն ունեցող շրջանակների ամրապնդում` հանրային տեղեկատվության անսահմանափակ հասանելիությունն ապահովելու համար և ընդհանուր իրավական դաշտի վերանայում` այն միջազգային չափանիշներին համապատասխանեցնելու համար:

Վրաստանի կառավարությանը նաև խրախուսվում է ծրագրի վրա աշխատելիս հաշվի առնել Եվրոպական հանձնաժողովի կողմից տրված հանձնարարականները՝ Եվրամիությանը Վրաստանի անդամակցության գործընթացի շրջանակներում։

«Առաջարկվող աշխատանքային պլանի մշակումն ու չկատարումը կարող է հանգեցնել Վրաստանի OGP անդամակցության կասեցմանը, քանի դեռ խնդիրները չեն լուծվել։ OGP-ի արժեքների և սկզբունքների շարունակական անտեսումը կարող է նաև հանգեցնել բաց կառավարման գործընկերությանը անդամակցության դադարեցմանը»,- ասվում է OGP-ի հայտարարության մեջ:

Վրաստանի կառավարությունը աշխատանքային պլանը պետք է ներկայացնի մինչև 2024 թվականի հունիսի 6-ը։

Բաց կառավարման գործընկերությունը միավորում է 75 անդամ երկրների կառավարություններ և քաղաքացիական հասարակության հազարավոր կազմակերպություններ: Անդամ երկրների կառավարությունները պարտավորվում են կառավարումը դարձնել ավելի բաց, արդյունավետ և թափանցիկ, ապահովել քաղաքացիների ներգրավվածությունը որոշումների կայացման գործընթացում և հանրային ծառայությունների հեշտ և հարմարավետ մատուցում: 2017 թվականին Վրաստանը մեկ տարի ժամկետով ընտրվեց OGP նախագահ, իսկ 2019-2022 թվականներին Գերմանիայի և Ինդոնեզիայի հետ ընդգրկվեց OGP ղեկավար կոմիտեում, որտեղ երկիրը ներկայացնում էր կառավարության աշխատակազմի ղեկավարը։