Պատգամավոր Նոնա Մամուլաշվիլին լքում է խորհրդարանն ու «Ազգային շարժումը»

«Երկու տարի առաջ ես եկա քաղաքականություն և խորհրդարան՝ նպատակ ունենալով աշխատել երկրի արևմտամետ զարգացման համար, այն է՝ ստեղծել տնտեսապես ամուր, արդար և պաշտպանված միջավայր։

Մի միջավայրում, որտեղ աղքատությունն ու հուսահատությունը միասին տանջում են երկրին, երբ բանտում քաղբանտարկյալներ կան, իսկ օլիգարխիայի համակարգը մեր ձեռքից խլել է եվրոպական ապագան, Վրաստանի խորհրդարանը դարձել է մի վայր, որտեղ երկրի համար ոչ մի լավ բան չի արվում և ոչինչ հնարավոր չէ անել:

10-րդ գումարման խորհրդարանը անկախության պատմության մեջ ամենախայտառակ խորհրդարանն է, ինչի մասին վկայում է հասարակության միայն 16 տոկոս վստահությունը։ Այս խորհրդարանի մեծամասնությունը ստորագրեց երկրի եվրոպական ապագայի ոչնչացումը, դրանով իսկ դավաճանելով նախորդ բոլոր գումարման խորհրդարանների ոգուն և ամենակարևորը՝ ժողովրդի կամքին։

Ինչ վերաբերում է «Ազգային շարժմանը», ապա կուսակցությունը վաղուց դատարկվել է քաղաքականությունից։ Համակարգային խնդիրները նորարարության ու վերականգնման հնարավորություն չեն տալիս։

Ողբերգականն այն է, որ դա միաժամանակ՝ բոլորի և ոչ ոքի մեղքն է, ինչն էլ ավելի է ամրապնդում քաղաքական փակուղին։

Այսօր, ինչպես 2020 թվականին, ես ունեմ նույն ու պարզ նպատակը՝ գործողությունը։ Ես տեսնում եմ, որ այսօր ավելի հնարավոր է կուսակցական քաղաքականությունից դուրս աշխատել այս երկրի շահերի համար»,- գրում է Մամուլաշվիլին։ Նրա խոսքով, ինքը միանում է «Գամզիրի» հարթակին, որտեղ վրացի, եվրոպացի և ամերիկացի ընկերների հետ միասին աշխատում են երկրին անհրաժեշտ լայնածավալ միջազգային նախագիծ սկսելու ուղղությամբ, որի նպատակը, «իհարկե, կլինի պայքարը հանուն երկրի արևմտյան ապագայի»։

Նոնա Մամուլաշվիլին այս տարվա հունիսին նույնպես ասել էր, որ խորհրդարանից միայն ամբողջական ընդդիմադիր սպեկտրի դուրս գալն արդյունք կտա։

Օրեր առաջ «Ստրատեգիա Աղմաշենեբելիի» առաջնորդ Գիորգի Վաշաձեն ասել էր, որ իր թիմը նույնպես մտածում է խորհրդարանից դուրս գալու մասին, քանի որ մեկ միջավայրում «ռուսամետների հետ լինելն անտանելի է»։