ՆԳՆ-ն հայտնում է, որ Թբիլիսիում և մարզերում առգրավվել է ապօրինի զենք, ձերբակալվել է 9 մարդ

ՆԳՆ տեղեկատվության համաձայն՝ Թբիլիսիի ոստիկանության գլխավոր վարչության Դիդուբե-Չուղուրեթիի գլխավոր բաժնի աշխատակիցները ձերբակալել են 1988 թվականին ծնված, նախկինում դատապարտված Ի.Ն.-ին։

«Դատավորի որոշման հիման վրա ամբաստանյալի բնակարանի խուզարկության ժամանակ իրավապահները որպես ապացույց առգրավել են ատրճանակ, փամփշտակալ և 12 փամփուշտ»,- ասվում է գերատեսչության հաղորդագրությունում։

Կախեթիում տարբեր ժամանակահատվածներում ձերբակալվել է 4 անձ՝ նախկինում դատապարտված, 1989 թվականին ծնված Դ.Բ.-ն, 1979 թվականին ծնված Զ.Մ.-ն, 1974 թվականին ծնված Դ.Շ․-ն և 1973 թվականին ծնված Է․Վ-ն։ Նրանք մեղադրվում են 3 ատրճանակ, ավտոմատ տեսակի հրազեն, որսորդական հրացան, 4 փամփշտատուփ, 77 փամփուշտ և մեկ նռնակ ունենալու մեջ։

Աջարիայի ոստիկանության բաժանմունքի աշխատակիցները բերման են ենթարկել օտարերկրյա մի քաղաքացու։ Ինչպես հայտնում են ՆԳՆ-ից, ոստիկանները 1976 թվականին ծնված Ա.Օ.-ի անձնական և ժամանակավոր բնակության վայրի խուզարկության արդյունքում որպես ապացույց առգրավել են ատրճանակ, 41 փամփուշտ և փամփշտատուփ։

«Նույն բաժնի ծառայողների կողմից նախկինում մի շարք հանցագործությունների համար դատապարտված, 1972 թվականին ծնված Օ.Է.-ի անձնական խուզարկության արդյունքում հայտնաբերվել է հրազեն, 15 փամփուշտ և փամփշտատուփ»,– հայտնել են ներքին գործերի նախարարությունից։

Գործակալության տեղեկություններով՝ Մառնեուլիի ոստիկանության աշխատակիցները 2001 թվականին ծնված օտարերկրյա քաղաքացի Դ.Հ.-ի Մառնեուլիում գտնվող ժամանակավոր բնակարանի խուզարկության արդյունքում որպես ապացույց առգրավել են հրազեն, 10 փամփուշտ և փամփշտատուփ։

Շիդա Քարթլիում ձերբակալվել է 1984 թվականին ծնված Գ.Ա.-ն։ Ըստ ՆԳՆ-ի, ոստիկանները նրա մոտ հայտնաբերել են հրազեն, 15 փամփուշտ և փամփշտատուփ։

Գործերը քննվում են ապօրինի կերպով հրազեն, ռազմամթերք գնելու, պահելու, կրելու հոդվածով։ Հանցագործությունն ապացուցվելու դեպքում ամբաստանյալներին սպառնում է 3-ից 7 տարվա ազատազրկում։