Նախագահի նստավայրը ֆիզիկապես պաշտպանելու գաղափարն արժեզրկում է բողոքի ակցիան․ Գախարիա

Գախարիայի խոսքով՝ ատրիբուտները նախագահին լեգիտիմություն չեն տալիս, հատկապես՝ շենքը։

«Լեգիտիմության աղբյուրը մարդկանց վստահությունն է։ Բողոքի մակարդակի իջեցումը մինչև շենքը լքել-չլքելը և նստավայրը ֆիզիկապես պաշտպանելու գաղափարը, արժեզրկում է բողոքի ակցիան։ Մարդիկ Ռուսթավելիի պողոտայում պաշտպանում են շատ ավելի մեծ և կարևոր արժեքներ։ Դրա համար էլ բողոքի ակցիան հաջողված է։

Պետք է հոգ տանել ժողովրդի, հաղթանակի հավատի, բողոքի նպատակների ու արժեքների շուրջ համախմբվածության մասին։ Միայն այդպես բողոքի ակցիան իսկապես ընդգրկուն կդառնա։

Անվերապահորեն պետք է ազատ արձակվեն բոլոր ապօրինի կալանավորված քաղաքական պատանդները։ Ժամանակին պետք է հայտարարվի նոր ընտրությունների կոնկրետ օրը»,- գրել է Գախարիան Facebook սոցիալական ցանցում։

Դեկտեմբերի 25-ին Օրբելիանիների պալատում նախագահի հետ հանդիպումից հետո ընդդիմադիր «Ուժեղ Վրաստան» միավորման առաջնորդներից Անա Դոլիձեն ասել է, որ կուսակցությունները պատրաստ են նույնիսկ դեկտեմբերի 29-ից հետո մնալ պալատում և այն հայտարարել միակ վայրը, որտեղ կլինի Վրաստանի լեգիտիմ նախագահը»։ Նախագահ Սալոմե Զուրաբիշվիլիի դիրքորոշումն այս հարցում դեռ անհայտ է։

Ոչ լեգիտիմ վարչապետ Իրակլի Կոբախիձեն Սալոմե Զուրաբիշվիլիին սպառնում է ձերբակալությամբ։ Ինչպես նա է ասել դեկտեմբերի 22-ին կայացած ճեպազրույցում, քրեական հանցագործություն կլինի, եթե Զուրաբիշվիլին մնա նախագահի նստավայրում դեկտեմբերի 29-ից հետո։

«Կարծում եմ՝ նա ունի բավարար իմաստություն, որպեսզի ոչ ինքը խախտի քրեական օրենսգիրքը, ոչ էլ թույլ տա որևէ մեկին խախտել այնպիսի նորմեր, որոնք կենթադրեն նրանց երկարաժամկետ ազատազրկումը»,- ասել է Կոբախիձեն։

Միխեիլ Կավելաշվիլիի երդմնակալությունը տեղի կունենա ոչ լեգիտիմ խորհրդարանում կիրակի օրը՝ դեկտեմբերի 29-ին: Սալոմե Զուրաբիշվիլին և խորհրդարանական ընտրություններում անցողիկ շեմը հաղթահարած ընդդիմադիր կուսակցությունները չեն ճանաչում Կավելաշվիլիի լեգիտիմությունը։ Ինչպես հայտարարել է Զուրաբիշվիլին, իր «մանդատը շարունակվում է այնքան ժամանակ, քանի դեռ չի եղել լեգիտիմորեն ընտրված խորհրդարան», որը կընտրի վեցերորդ նախագահին։