Կոբախիձեն Բեռլինում կմասնակցի Ուկրաինայի վերականգնմանը նվիրված համաժողովին

Հունիսի 11-ին Գերմանիայի կանցլեր Օլաֆ Շոլցը և Եվրահանձնաժողովի նախագահ Ուրսուլա ֆոն դեր Լեյենը կմասնակցեն Ուկրաինայի վերականգնմանը նվիրված համաժողովին։ Օրակարգի համաձայն՝ նախատեսված է Ուկրաինայի արտաքին գործերի նախարար Դմիտրի Կուլեբայի ելույթը։

Համաժողովը հյուրընկալում են Գերմանիան և Ուկրաինան։ Այս տարվա միջոցառման հիմնական նպատակն է մոբիլիզացնել միջազգային աջակցությունը Ուկրաինայի վերականգնման, վերակառուցման, բարեփոխումների և արդիականացման համար: URC2024-ը կենտրոնանալու է չորս թեմատիկ ոլորտների վրա. մասնավոր հատվածի մոբիլիզացում՝ վերականգնման և տնտեսական աճի համար, սոցիալական վերականգնում և մարդկային կապիտալ՝ Ուկրաինայի ապագայի համար, մունիցիպալիտետների և մարզերի վերականգնում, Եվրամիությանն անդամակցություն և հարակից բարեփոխումներ:

Ուկրաինայի վերականգնման համաժողովն անցկացվում է արդեն երրորդ անգամ։ 2022 և 2023 թվականներին միջոցառումը հյուրընկալել են Շվեյցարիան և Մեծ Բրիտանիան։

Մայիսի 30-ին Ուկրաինայի կառավարությունն արձագանքել է Վրաստանի վարչապետ Իրակլի Կոբախիձեի հայտարարությանը, թե Ուկրաինան «ավերված է», և որ երկրի տարածքի 20%-ի օկուպացման և տասնյակ հազարավոր մարդկանց զոհվելու պատճառը 2013 թվականի Մայդանի արդյունքն է։ Արտաքին գործերի նախարարությունը դատապարտել է Իրակլի Կոբախիձեի «ոչ բարեկամական հայտարարությունները» և «խեղաթյուրված գնահատականները» ուկրաինական զարգացումների վերաբերյալ։ «Ցավալի է տեսնել Վրաստանի վարչապետի քաղաքական հայտարարությունների հետևողական և մշտական ​​դեգրադացումը, որոնք վերջին շրջանում դժվար է տարբերել Ռուսաստանի ղեկավարության հայտարարություններից», - ասվում է նախարարության հայտարարության մեջ։