ԱՄՆ Կոնգրեսում կայացած լսումների ժամանակ պետքարտուղարի օգնականի տեղակալ Ջոշուա Հաքը հայտարարել է, որ Վրաստանի կառավարությունը կտրուկ շեղվել է երկրի անցյալի ժողովրդավարական ուղեգծից, իսկ այսպես կոչված «օտարերկրյա ազդեցության» օրենքը այս հակաժողովրդավարական փոփոխության խորհրդանիշն է։ ԱՄՆ-ում հույս ունեն, որ Վրաստանի ղեկավարները կվերադառնան եվրատլանտյան նկրտումներին։ Ըստ Հաքի, դրա լավագույն միջոցը վերը նշված օրենքը չեղյալ հայտարարելն է, ԱՄՆ-ի մասին ապատեղեկատվության տարածման դադարեցումը, այլ ոչ ժողովրդավարական օրենսդրության առաջընթացի կասեցումը և հոկտեմբերին կայանալիք խորհրդարանական ընտրություններն ազատ ու արդար միջավայրում անցկացնելը։
Լրահոս
«Այս լսումները տեղի են ունենում թե՛ մեր երկկողմ հարաբերությունների, թե՛ Վրաստանի ապագա ժողովրդավարության համար շատ կարևոր ժամանակաշրջանում։ Վրաստանի կառավարությունը կտրուկ շեղվել է երկրի անցյալի ժողովրդավարական ուղեգծից՝ վտանգի տակ դնելով իր եվրոատլանտյան նկրտումները և հարաբերությունները Միացյալ Նահանգների հետ: Նրանք ընդունեցին ոչ ժողովրդավարական օրենսդրություն, հրեշացրին քաղաքացիական հասարակությունը, տարածեցին ապատեղեկատվություն և հռետորական հարձակումներ սկսեցին ԱՄՆ-ի և եվրոպացի գործընկերների դեմ, ովքեր տասնամյակներ շարունակ աջակցել են Վրաստանին: Այս հակաժողովրդավարական փոփոխության խորհրդանիշն է իշխող «Վրացական երազանքի» մայիսի 28-ին ընդունած «օտարերկրյա ազդեցության» օրենքը։
Այս օրենքը, որը արտացոլում է Ռուսաստանում գործող օրենքը, կոչված է ճնշելու քննադատական ձայները, շանտաժի ենթարկելու անկախ հասարակական կազմակերպությունների ակտիվիստներին և լրագրողներին և վախի միջոցով հպատակեցնելու Վրաստանի ակտիվ քաղաքացիական հասարակությանը: «Վրացական երազանքի» կառավարությունն ընդունեց այս օրենքը՝ չնայած իր քաղաքացիների զանգվածային բողոքին, ԱՄՆ-ի ընդդիմությանը և Եվրախորհրդի Վենետիկի հանձնաժողովի հստակ եզրակացությանը, որ օրենքը անհամատեղելի է եվրոպական նորմերին»,- հայտարարել է Ջոշուա Հաքը։
Նրա խոսքով՝ վերջին ամիսներին ԱՄՆ Պետդեպարտամենտը ներգրավված է եղել բոլոր մակարդակներում, որպեսզի վրաց ժողովրդին հասկացնի, որ ԱՄՆ-ը շարունակում է աջակցել նրանց ժողովրդավարական, եվրաատլանտյան ձգտումներին և միևնույն ժամանակ հայտարարելու, որ Վրաստանի կառավարությունը սխալ ուղղությամբ է գնում։
«Վրաստանի իշխող կուսակցության որոշումների արդյունքում մայիսի 23-ին պետքարտուղար Բլինքենը հայտարարեց վիզային սահմանափակման նոր քաղաքականության մասին՝ օգնելու պատասխանատվության ենթարկել նրանց, ովքեր խաթարում են Վրաստանում ժողովրդավարությունը: Նա նաև հայտարարեց մեր երկկողմ հարաբերությունների համապարփակ վերանայման մասին, ներառյալ մեր օգնությունը Վրաստանին։ Հունիսի 6-ին մենք քայլեր ձեռնարկեցինք՝ վիզային սահմանափակումներ մտցնել Վրաստանի իշխող կուսակցության ներկայացուցիչների, խորհրդարանականների և իրավապահ մարմինների ներկայացուցիչների համար, ովքեր պատասխանատու են կամ մեղսակից են Վրաստանում ժողովրդավարությունը խարխլելու մեջ։
Այս քայլերը հիմնված են մեր նախկին գործողությունների վրա, ինչպիսիք են վիզային սահմանափակումները կոռումպացված դատավորների նկատմամբ և ֆինանսական պատժամիջոցները վրաց-ռուս օլիգարխ Օթար Փարցկալաձեի նկատմամբ, որը կապված է «Էֆ Էս Բե»-ի հետ: Մենք նաև սերտորեն համագործակցում ենք միջգերատեսչական գործընկերների հետ լրացուցիչ քայլերի շուրջ, ներառյալ օգնության ծրագրերի հնարավոր վերաուղղորդումը կամ կասեցումը և քաղաքականության մեջ ներգրավվածության դադարեցումը: Պաշտպանության դեպարտամենտը վերջերս հայտարարեց Վրաստանում զորավարժությունների անժամկետ հետաձգման մասին։
Մենք հուսով ենք, որ Վրաստանի ղեկավարները կվերանայեն իրենց գործողությունները և կվերադառնան Վրաստանի վաղուց հայտարարված եվրոատլանտյան նկրտումներին։
Մենք Վրաստանի կառավարությանը հստակ ասել ենք, որ դա անելու լավագույն միջոցն է չեղյալ համարել արտաքին ազդեցության մասին օրենքը, դադարեցնել ԱՄՆ-ի մասին ապատեղեկատվությունը, դադարեցնել այլ ոչ ժողովրդավարական օրենսդրության առաջխաղացումը և ապահովել, որ նախընտրական շրջանը և հոկտեմբերի խորհրդարանական ընտրություններն ազատ և արդար լինեն։
Մենք կառավարության հետ ընդգծել ենք ազատ և արդար ընտրությունների ապահովման կարևորությունը և նշել, որ շատ ուշադիր հետևում ենք ընտրական գործընթացներին։ Մենք աջակցել ենք Վրաստանի՝ ԵԱՀԿ դիտորդական առաքելություն ստեղծելու խնդրանքին և կոչ ենք արել կառավարությանը՝ ապահովել միջազգային և տեղական դիտորդների անարգել մուտքը»,- ասել է պետքարտուղարի օգնականի տեղակալը։
Ինչպես նշել է նա, 2024 թվականը վճռորոշ տարի է Վրաստանի ապագայի և նրա ժողովրդավարական առաջընթացի համար։ Ջոշուա Հաքը հաստատել է իր ամուր աջակցությունը Վրաստանի քաղաքացիական հասարակությանը «իշխանությունների կողմից ճնշումների, ոտնձգությունների և ֆիզիկական հարձակումների պայմաններում»:
«Մենք կանոնավոր կապի մեջ ենք քաղաքացիական հասարակության ներկայացուցիչների հետ և ակտիվորեն աջակցում ենք նրանց ջանքերին՝ ապահովելու, որ հոկտեմբերի ընտրությունները լինեն ազատ և արդար։ Վրաց ժողովուրդը պետք է որոշի Վրաստանի ապագան։
Պետք է հիշել Վրաստանին սպառնացող ապագա սպառնալիքները Ռուսաստանից, որը մինչ օրս օկուպացված է պահում Վրաստանի տարածքի 20%-ը։
Եզրափակելով՝ ես կցանկանայի վերահաստատել, որ չնայած այս դժվարին ժամանակներին, Միացյալ Նահանգների հավատարմությունը վրաց ժողովրդին մնում է անսասան և անփոփոխ։ Ամերիկացիներն ու վրացիները կիսում են հատուկ բարեկամություն՝ հիմնված ազատության և անկախության սիրո մեր ընդհանուր արժեքների վրա։ Մենք կշարունակենք աջակցել ուժեղ, անվտանգ և ժողովրդավարական Վրաստանի հետագա զարգացմանը»:
Ներկայացուցիչների պալատի արտաքին հարաբերությունների հանձնաժողովում կայացած լսումների թեման Վրաստանում և Մոլդովայում ԱՄՆ քաղաքականությունն էր՝ 2024 թվականին այս երկրներում կայանալիք ընտրություններին ընդառաջ։
