Հայաստանում ձերբակալվել է Ռուսաստանի կողմից հետախուզվող Վրաստանի քաղաքացի

Գեորգի Կինոյանը ձերբակալվել է սեպտեմբերի 3-ին՝ վրաց-հայկական սահմանը հատելուց հետո։ Եղբոր խոսքով՝ երբ նա հատել է Վրաստանի սահմանը, «տեղեկություն չի ունեցել, որ իրեն կկալանավորեն կամ որ որևէ խնդրի կհանդիպի»։

«Հայկական սահմանը հատելիս սահմանապահների համակարգչում ցույց է տվել, որ նա Ռուսաստանի կողմից հետախուզվում է կարմիր շրջաբերականով։ Ինչպես ես պարզեցի փաստաբաններից, Հայաստանը, Ռուսաստանը և մի քանի այլ երկրներ այս հարցում ընդհանուր բազա ունեն։

Հայ փաստաբանները մեզ որևէ հույս չեն տալիս. նրանք ասում են, որ արտահանձնման հավանականությունը շատ բարձր է։

Ես այցելել եմ Հայաստանում Վրաստանի դեսպանատուն, բայց այս փուլում մենք որևէ պատասխան չունենք։ Նրանք մեզ ասացին, որ ունեն տեղեկատվություն, և համապատասխան կառույցները աշխատում են, բայց ոչ ոք չի կապվել ընտանիքի անդամների հետ։ Միաժամանակ, այսօր մենք պատրաստվում ենք դիմել Արդարադատության նախարարությանը, Արտաքին գործերի նախարարությանը և բոլոր այն կառույցներին, որոնք կարող են մեզ օգնել», - ասել է Կինոյանի եղբայրը։

2024 թվականի հոկտեմբերի 25-ին Դոնեցկի Ժողովրդական Հանրապետության այսպես կոչված Գերագույն դատարանը հեռակա կարգով դատապարտել է Գիորգի Կինոյանին և մեղավոր ճանաչել Ռուսաստանի Դաշնության Քրեական օրենսգրքի 359-րդ հոդվածի 3-րդ մասով («Վարձկանի մասնակցությունը զինված հակամարտությանը»)։ Կինոյանը դատապարտվել է յոթ տարվա ազատազրկման։

Ռուսաստանի քննչական կոմիտեի տվյալներով՝ Գիորգի Կինոյանը կամավոր կերպով ժամանել է Ուկրաինա 2022 թվականի մարտից ապրիլ ընկած ժամանակահատվածում և միացել Կիևում գտնվող «Վրացական ազգային լեգեոնին», անցել է ռազմական պատրաստություն, որից հետո մասնակցել է Ուկրաինայի կողմից իրականացվող ռազմական գործողություններին։

«Վրացական ազգային լեգեոնը» Ռուսաստանում հայտարարված է ահաբեկչական կազմակերպություն, իսկ դրա առաջնորդ Մամուկա Մամուլաշվիլին քննչական մարմինների կողմից գտնվում է միջազգային հետախուզման մեջ։

«Իր գործողություններով Կինոյանը նպաստել է զինված հակամարտության շարունակմանը և տարածաշրջանում անկայունության ստեղծմանը։ Դատարանի որոշմամբ նա հեռակա կարգով դատապարտվել է 7 տարվա ազատազրկման։ Նա գտնվում է միջազգային հետախուզման մեջ», - հայտնել է քննչական կոմիտեն։

Ռուսաստանը հեռակա կարգով դատել է Ուկրաինայում կռվող Վրաստանի տասնյակ քաղաքացիների։