Դատապարտում ենք կառավարության բոլոր գործողությունները, որոնք հանգեցրել են ժողովրդավարության անկման․ Մակրոն, Մերց, Տուսկ

«Վրաստանի անկախության օրվա կապակցությամբ մենք կցանկանայինք դիմել վրաց ժողովրդին բարեկամության և համերաշխության ուղերձով և վերահաստատել մեր անսասան աջակցությունը Վրաստանի ինքնիշխանությանը և տարածքային ամբողջականությանը։

Մենք աջակցում ենք վրաց ժողովրդի ժողովրդավարական և եվրոպական ձգտումներին։ Այս ձգտումները արտացոլում են եվրոպական ընտանիքի մաս կազմելու ցանկությունը։ Համապատասխանաբար, մենք դատապարտում ենք Վրաստանի կառավարության բոլոր գործողությունները, որոնք հանգեցրել են ժողովրդավարության անկման և քաղաքացիական հասարակության, լրատվամիջոցների և կառավարության քննադատների վրա հարձակումների։

Խոսքի և հավաքների ազատությունը պետք է պաշտպանված լինի։ Ուժի չափազանց կիրառման դեպքերը պետք է հետաքննվեն։ Եվրոպական չափանիշներին հակասող օրենքները պետք է փոխվեն, և անհրաժեշտ բարեփոխումների գործընթացը պետք է վերսկսվի։ Վրաստանի կառավարությունը պետք է վերականգնի երկխոսությունը ընդդիմության և քաղաքացիական հասարակության հետ։

Վրաստանի ժողովուրդը չպետք է զրկվի երկրի եվրոպական ուղու հետ կապված հնարավորություններից»։

«Վրաց ժողովրդի և վրացական պետության վրա ամոթալի հարձակում իրենց ազգային տոնի օրը», - ասել է «Վրացական երազանքի» խորհրդարանի նախագահ Շալվա Պապուաշվիլին՝ ի պատասխան Ֆրանսիայի, Գերմանիայի և Լեհաստանի առաջնորդների հայտարարության։